Kosovonun paytaxtı Priştinada keçirilmiş cüdo üzrə Açıq Avropa çempionatında Azərbaycan Cüdo Federasiyasının Hakimlər Heyətinin üzvü, “A” kateqoriyalı beynəlxalq dərəcəli hakim Nazim Umbayev ədalət təmsilçiləri arasında yer alıb. 

Prosport.Az xəbər verir ki, Nazim Umbayev qadınlar arasında 57 kq çəkidə Kaya Kayzer (Slovakiya) və Distria Krasniçi (Kosovo) arasında keçirilmiş bürünc medal uğrunda görüşü idarə edib.

İlk dəfə təşkil edilmiş cüdo üzrə Açıq Avropa çempionatından sonra Avropa Cüdo Birliyi (EJU) bir neçə şəxsi mükafatlandırıb. Üzərində EJU-nun macar prezidenti Laslo Totun imzası olan 2022-ci ildə Avropanın Ən mütərəqqi kişi hakimi mükafatı Nazim Umbayevə verilib. Qadın referi nominasiyasında isə xorvatiyalı Martina Prqomet təltif olunub. Hər iki mükafatı EJU-nun baş katibi, Avstriya Cüdo Federasiyasının prezidenti Martin Poyqer təqdim edib.

Həmçinin, bu yarışda Əməkdar bədən tərbiyəsi və idman xadimi Əli Dəvrişov EJU-nun İnformasiya Texnologiyaları üzrə Təşkilat Komitəsinin üzvü kimi fəaliyyət göstərib.

Qeyd edək ki, bu yarışda Azərbaycanı idmançı kimi Hidayət Heydərov təmsil edib. O, 73 kq çəki dərəcəsində bürünc medal qazanıb.

Səbuhi Musa