DÇ-2024-ün elit-raund mərhələsində futzal millimiz növbəti oyununu keçirib.

Prosport.Az xəbər verir ki, Bakı İdman Sarayında komandamız Rumıniya yığması ilə qarşılaşıb. Azərbaycan millisi fasiləyə hesabda üstün yollanıb – 2:0.

2-ci hissədə də üstünlük komandamızın tərəfində olub. Komandamız 5:3 öndə olsa da, 35-ci dəqiqədə rəqib tablodakı rəqəmləri eyniləşdirib və matç 5:5 hesabı ilə yekunlaşıb.

Qrupun digər görüşündə bütün oyunlarında qalib gələn Qazaxıstan Niderlandı 2:0 məğlub edib. Komandamız hazırda 4 xalla qrupda sonuncudur.

Oyundan sonra yığmamızın baş məşqçisi Vitali Borisov xal itkisinə baxmayaraq, futzalçılardan razı qaldığını bildirib: "Uşaqlar çox yaxşı oynadılar. Matç bizim nəzarətimiz altında keçdi. Rumıniya yaxşı müdafiə olunan komandadır. Oyundan əvvəl bunu uşaqlara demişdik. Bütün oyunu öndə idik. Sadəcə təcrübəmiz çatmadı. Rumıniya say üstünlüyü ilə daha yaxşı oynayır. Komandada 80 faiz yeni oyunçularımız var. Oyunçulardan çox razı qaldım".

Qeyd edək ki, komandamız dekabrın 20-də Niderlandla səfərdə qarşılaşacaq. Komandamız qrupda 2-ci yerdə olan rəqibinə qalib gələcəyi halda, pley-offa vəsiqə qazana bilər.