"Hələ ki Prezident Kubokunu xarici klublarla birgə keçirməyi düşünmürük. Çünki çövkən üzrə hələ xarici klublar formalaşmayıb. Biz ötən ay çövkən üzrə II dünya çempionatını təşkil etdik. Məsələn, orada çıxış edən Polşanın yığması olsa da, bu növ üzrə klubları yoxdur. Bu bizim idman növümüz olduğundan, biz çövkənin dünyada yayılmasında maraqlı olmalıyıq".

Prosport.Az-ın xəbərinə görə, bunu Azərbaycan Atçılıq Federasiyasının baş katibi Bəhruz Nəbiyev bildirib.

O bildirib ki, ötən il Prezident Kubokunun finalından sonra iştirakçılar arasında olan dava hakim mübahisəsi ilə bağlı olmayıb: "Bəli, ötən il belə bir xoşagəlməz hal baş verdi. Amma bu, heç də hakimlərin verdiyi qərarla bağlı deyildi. O münaqişə şəxsi müstəvidə baş verən olay idi. Bizdə hakim səhvləri ola bilər. Amma bunun üçün 4 tərəfdə də kamera quraşdırılıb və səhv olduğu halda, ora baxıb, qərar dəyişdirilə bilər".

Daha sonra Prezident Kubokunun püşkatma mərasimi keçirilib. "Sərhədçi" İdman Mərkəzində baş tutan tədbirdə iştirakçı komandaların rəsmiləri və media nümayəndələri iştirak edib.

Püşkün nəticəsinə əsasən, 8 komanda hərəsində 4 olmaqla 2 qrupa bölünüb. A qrupunda "Sərhədçi-Qarabağ", "Polad", "Köhlən" və "Şirvan" klubları, B qrupunda isə "Sərhədçi-Dilbaz", "Omar", "Zəfər" və "Embavud" kollektivləri mübarizə aparacaq.

Qrup oyunlarının nəticələrinə əsasən, ilk 2 pilləni tutan komandalar yarımfinala yüksələcək. Prezident Kubokunda yalnız milli cins atlar yarışacaq.

Yarışa sabah saat 10:00-da start veriləcək. İlk oyun saat 10:00-da, növbəti 2 qarşılaşma müvafiq olaraq, 11:00 və 12:00-da başlayacaq. Saat 15:00-da isə yarışın təntənəli açılış mərasimi təşkil olunacaq.