"Azərbaycan və Türkiyə millilərinin 10-12 noyabr tarixlərində Ermənistanın paytaxtı İrəvanda keçirilmiş sambo üzrə dünya çempionatında iştirak etməməsinin səbəbi KİV-ə yalan məlumat ötürülməklə çatdırılmışdır. Ermənistanın Təhsil, Elm, Mədəniyyət və İdman nazirinin müavini Karen Qiloyanın yerli mətbuata açıqlaması yalan və böhtanla doludur".

Prosport.Az-ın məlumatına görə, Azərbaycan Sambo Federasiyası bununla bağlı bəyanat yayıb.

Bəyanatda Karen Qiloyanın 12 noyabrda aravot.am saytına verdiyi məlumatın yalan olduğu bildirilib: "Bildirmək istəyirik ki, Azərbaycan Sambo Federasiyası Beynəlxalq Sambo Federasiyası (FIAS) tərəfindən diskvalifikasiya olunmayıb. Buna bariz nümunə FIAS-a 18 oktyabrda göndərdiyimiz rəsmi məktubdur. Orada göstərilib ki, aprel ayında İrəvanda keçirilmiş ağırlıqqaldırma üzrə Avropa çempionatının açılış mərasimində Azərbaycan dövlət bayrağı yandırılıb. İdman dəyərlərinə sığmayan bu hərəkəti və idmançılarımızın təhlükəsizliyinin qoruna bilinməyəcəyini nəzərə alaraq yarışda iştirak etməyəcəyimizi bildirmişik.

Bundan əlavə, Azərbaycan millilərinin diskvalifikasiya olunmamasını göstərən digər amil 6-8 oktyabrda Qırğızıstanın paytaxtı Bişkekdə keçirilmiş yeniyetmə və gənclər arasında dünya çempionatında sambo millimizin iştirakıdır. Ermənistan KİV-dən məlumatı yayarkən səhv məlumat yaymamağa, verilən istənilən açıqlamanı beynəlxalq qurumlar vasitəsilə dəqiqləşdirməyə çağırırıq".

Qeyd edək ki, Qiloyan bu sözləri bildirib: "Azərbaycan niyə iştirak etmir? Ona görə ki, qeyri-idman hərəkətinə yol verib və bu cür davranışı müntəzəm təkrarladığına görə beynəlxalq federasiya tərəfindən diskvalifikasiya edilib. Biz də bunları görmüşük. Məsələn, himn oxunarkən oturmaq, kürəyini fəxri kürsüyə tərəf çevirmək, xalçada uzanıb, çölə çıxmamaq və s. Onlar başqa ölkələrin nümayəndələri ilə belə davranırdılar. Ona görə də Beynəlxalq Sambo Federasiyası onlara əvvəlcə xəbərdarlıq edib, sonra isə müvəqqəti olaraq diskvalifikasiya edib. Ona görə də bu gün burada deyillər".

Karen Qiloyan Türkiyə millisinin olmamasını isə Azərbaycana həmrəylik nümayiş etdirmələri ilə əlaqələndirib: "Onlar da qərara gəldilər ki, Azərbaycan gəlməsə, onlar da gəlməyəcək. Onların qərarıdır. Deməyə söz yoxdur".