"Biz CEV-lə Azərbaycanda Akademiya yaradılması ilə bağlı müzakirə aparmışıq. Voleybolun aşağı yaş qruplarından etibarən inkişafı üçün söhbətimiz oldu. CEV prezidenti Aleksandar Boriçiç də bu barədə öz yaxşı təkliflərini irəli sürdü. Bu Akademiyanın nə vaxt tikiləcəyi barədə indidən dəqiq söz demək mümkün deyil. Bu ideya kimi atdığımız təşəbbüsdür".

Prosport.Az-ın məlumatına görə, bunu Azərbaycan Voleybol Federasiyasının prezidenti Şahin Bağırov mətbuat konfransında deyib.

Federasiya rəhbəri Avropa Voleybol Konfederasiyasının prezidenti Aleksandar Boriçiçin Bakıya səfərini yüksək qiymətləndirib: "Əsas istiqamət gənclərin, məktəblilərin bu idman növünə cəlb edilməsidir. Bünövrə yaxşı olmasa, nailiyyətlər əldə edə bilməyəcəyik. Aşağı yaş qruplarında voleybolun inkişafı bizim üçün prioritetdir".