"Bu gün Bakıda məktəblərdə voleybolun inkişafı, eləcə də Bolqarıstanda keçirilən məşqçilərin konfransı barədə müzakirə apardıq. Son bir neçə ildə biz voleybolun inkişafı yönündə bir neçə addım atmışıq. Şadam ki, İtaliya, Bolqarıstan, Türkiyə və Azərbaycan voleybol federasiyaları əməkdaşlıq barədə sənədə imza atıb".

Prosport.Az xəbər verir ki, bunu Avropa Voleybol Konfederasiyasının (CEV) prezidenti Aleksandar Boriçiç deyib.

Serbiyalı mütəxəssis bildirib ki, Azərbaycana dövlət səviyyəsində dəstəyin olması federasiyanın xeyrinədir: "Biz arzulayırıq ki, Azərbaycan beynəlxalq yarışlara ev sahibliyi etsin. Çünki sizin federasiya ölkə daxilindən yaxşı dəstək alır. Çox sevinirik ki, dövlət tərəfindən belə bir dəstək var".

Qeyd edək ki, Avropa Voleybol Konfederasiyasının (CEV) Prezidenti Aleksandar Boriçiç, CEV-in vitse-prezidenti Renato Arena, Türkiyə Voleybol Federasiyasının prezidenti Akif Üstündağ və Bolqarıstan Voleybol Federasiyasının prezidenti Lyubomir Qanev Bakıda səfərdədir.

Qonaqlar bu gün Bakı İdman Sarayında baş tutacaq Azərbaycan çempionatının açılış mərasimində iştirak edəcəklər, həmçinin Yüksək Liqanın ilk qarşılaşması olan "Azərreyl" – "Abşeron" görüşünü izləyəcək.

Səbuhi Musa