"Biz oyunun əvvəlindən səbətə dəqiq atışlar edə bilmədik. Hücumlar zamanı tələsdik, topla mümkün qədər çox hərəkət etmədik. Həmçinin, müdafiədə də yüksək səviyyədə çıxış etmədik və ribaundları ala bilmədik. Rəqib isə hücumda ribaundları qazanmaqla 2-ci şans atışı həyata keçirə bilirdi".

Prosport.Az-ın xəbərinə görə, bunu "Şəki" basketbol klubunun nigeriyalı baş məşqçisi Aleksander Uco deyib.

O, Azərbaycan Basketbol Liqasının II turunun son görüşündə "Sərhədçi"yə evdə 74:81 hesabı uduzmalarının səbəbini açıqlayıb: "Müdafiəyə mümkün qədər tez qayıda bilmirdik. Deməli, müdafiədə əlaqə, ünsiyyət çox zəif idi. Bir-birimizə müdafiədə danışıb kömək etməliydik. Üstəlik, oyunun əvvəllərindən erkən faullar almağa başladıq".

"Sərhədçi"nin baş məşqçisi Vladimir Boşnyak isə bu sözləri deyib: “Çətin oyun oldu. Qələbə qazandıq. Cəbrayıl Əkbərov, Ben Stivens, Dmitri Juravlov haqqında xoş sözlər demək olar. Cekson Rid 30 xal qazandı və bu mükəmməldir. Lakin bəzi səhvlərimiz var və onların üzərində işləməliyik. Çatışmayan cəhətləri aradan qaldırmalıyıq. Əgər bütün şanslarımızdan istifadə etsəydik, 20 xal fərqlə qalib gələrdik. Biz komandanı inkişaf etdiririk. Daha yaxşı oynamağa çalışmalıyıq. Hələ ki, öyrənməyə davam edirik. Oyunlarımızdan dərs götürməliyik. Meydançada daha da yaxşı olmalıyıq. Bu gün isə yaxşı idik”.