Cüdo üzrə olimpiya, ikiqat dünya mükafatçısı və Avropa çempionu Rüstəm Orucov Avropa Olimpiya Komitəsinin Atletlər Komissiyasına üzv seçilə bilər.

Prosport.Az-ın məlumatına görə, 7 noyabrda İtaliyanın paytaxtı Romada VII Avropa Atletlərinin Forum və Assembleyası çərçivəsində seçki keçiriləcək.

Seçkidə Azərbaycan Atletlər Komissiyasının sədri Orucov da namizədlər arasında var. Azərbaycanı bu seçkidə Azərbaycan Atletlər Komissiyasının üzvləri – yunan-Roma güləşçisi Rəsul Çunayev və taekvondoçu Fəridə Əzizova təmsil edəcək. Rüstəmin özü isə Yaponiyada məşqçilik təlimində iştirak etdiyindən, seçki prosesinə qatıla bilməyəcək.

Orucovdan başqa daha 10 idmançı yay atletləri arasında sözügedən komissiyada üzvlüyə namizəddir. Ən çox Avropa Kanoe Assosiasiyasından (3) idmançı burada var. Digər namizədlər yay idman növlərindən Robert Akmen (Latviya, kanoe), Qoqita Arkania (Gürcüstan, karate), Zorana Arunoviç (Serbiya, atıcılıq), Aqnyeşka Kobus-Zavoyska (Polşa, avarçəkmə), Anastasiya Kojenkova (Ukrayna, avarçəkmə), Danyele Lupo (İtaliya, çimərlik voleybolu), Aleksandra Miskovska (Slovakiya, kamandan oxatma), Ronald Raue (Almaniya, kanoe), Deneş Varqa (Macarıstan, su polosu), qış idman növlərindən isə Yohanna Taliharm (Estoniya, biatlon) və Aleksander Payerdir (Avstriya, snoubord).

3 yay və 1 qış idman növlərindən komissiyaya namizəd seçiləcək. Daha sonra onların arasından 1 nəfər hazırda rəhbəri olan Avropa Atletlər Komissiyasının sədri, estoniyalı sabiq atlet (diskatma) Qerd Kanteri əvəzləyəcək.

Qeyd edək ki, 32 yaşlı Rüstəm Orucov may ayında Avropa Cüdo Birliyinin Atletlər Komissiyasının üzvü təyin olunub. O, avqustda rəsmi olaraq idmançı karyerasını başa vurduğunu açıqlayıb.

Səbuhi Musa