“Sumqayıt” basketbol komandasının baş məşqçisi Teymur Hüseynov klubun mətbuat xidmətinə müsahibə verib.
Prosport.Az həmin müsahibəni təqdim edir:
– Yeni yaradılan komandanın perspektivləri haqda nə deyərdiniz?
– Komanda dediyiniz kimi yeni yaranıb. Əslində bizim 5 legionerimiz olmalı idi. 4 transfer həyata keçirmişdik, təəssüf ki, 1-i klubu erkən tərk etdi. Hazırda 2 əcnəbi oyunçu axtarışındayıq, 1 yerli basketbolçunun da keçidini rəsmiləşdirmək istəyirik. Bunu həll edə bilsək, hər şey normal olacaq. Əslində, ilk turda “NTD-İndiqo”ya qarşı yaxşı oynamışdıq. Sadəcə, gücümüzü sona qədər bölüşdürə bilmədik. Bu oyunda 3 legionerin xidmətindən lazımı qədər yararlana bildik, amma yerlilər hələ bir qədər zəif təsir bağışlayır. Öncə qeyd etdiyim kimi, istədiyimiz oyunçuları heyətə cəlb edə bilsək, vəziyyət qaydasına düşəcək. Təbii ki, əsas hədəfimiz pley-offa vəsiqə qazanmaqdır.
– Qarşıda komandanı “Xırdalan”la oyun gözləyir. Bu oyunda nəyə ümid edirsiniz?
– Uşaqları oyuna çox yaxşı kökləyirik. Bu matçda sona qədər döyüşəcəyik. Legionerlər əsl məharətini göstərə bilsə, “Xırdalan”a qalib gələcəyik.
– Bəs “Xırdalan”ın gücü haqqında nə deyərdiniz?
– “Xırdalan” yaxşı komandadır. Heyətində 5-6 legioner çıxış edir. Onların yerli oyunçularının səviyyəsi də yüksəkdir. Buna baxmayaraq, rəqibdən çəkinmirik!
– “Sumqayıt”da legionerlərin səviyyəsi haqda nə deyərdiniz?
– Heyətdə yüksək səviyyəli əcnəbi basketbolçular var. 3-nün oyun keyfiyyətinə söz ola bilməz. 1 legionerimiz də kürək nahiyəsindəki zədə səbəbindən komandadan getdi. Son məşqə gəlmədi, sonra da xəbər tutduq ki, əşyalarını toplayaraq çıxıb gedib.
– “Sumqyıt”ın pley-off şansları haqda nə deyərdiniz?
– Dediyim kimi, istədiyimiz transferləri reallaşdıra bilsək, pley-offa vəsiqə şansımız olacaq. Çünki çempionatda əsas güclü komandalar “Sabah” və “NTD-İndiqo”dur. Qalan 8 komandanın səviyyəsi eynidir.
– Ev oyunlarını Sumqayıt şəhərində keçirdikdə bu nəticələrə nə dərəcədə müsbət təsir göstərəcək?
– Əlbəttə, biz bunu səbirsizliklə gözləyirik. Orada komanda böyük azarkeş dəstəyi altında oynayacaq. Məncə, “Sumqayıt”sevərlər arenanı dolduracaq.
– Rəhbərliyin komandaya dəstəyi haqda nə deyərdiniz?
– Rəhbərlik bizə yüksək səviyyədə dəstək verir. İstədiyimiz oyunçuları düşərgəyə gətirirlər. Buna görə onlara təşəkkür edirəm.