Birləşmiş Ərəb Əmirliklərinin paytaxtı Əbu-Dabi şəhərində keçirilən veteranlar arasında dünya çempionatında Azərbaycan təmsilçiləri artıq 7 medal (2 qızıl, 1 gümüş, 4 bürünc) qazanıb.

Prosport.Az xəbər verir ki, ilk gündə M6 yaş kateqoriyası üzrə +100 kq çəki dərəcəsində Azər Əsgərov qızıl medal əldə edib.

M7 yaş kateqoriyası üzrə 90 kq çəkidə Fərhad Rəcəbli bütün rəqiblərinə qalib gələrək çempionatın qızıl medalına sahib olub. Bu qələbə Fərhad Rəcəblinin usta cüdoçular arasında dünya çempionatlarında qazandığı 11-ci qızıl medal olub.

M8 yaş kateqoriyası üzrə isə 100 kq çəkidə Arif Qasımov yarışın bürünc medalını əldə edib.

Yarışın 2-ci günündə M1 yaş kateqoriyası üzrə +100 kq çəkidə Qurban Məmmədli finalda uduzaraq gümüş medalla kifayətlənib.

M3 yaş kateqoriyası üzrə 66 kq çəkidə Elçin Mayılov, 81 kq çəkidə Zülfüqar Hüseynov və 100 kq çəkidə Nizami Məmmədov bürünc medal əldə edib.

Qeyd edək ki, dünya çempionatına sabah yekun vurulacaq.