Azərbaycanın cüdo millisində böyüklər arasında yeganə dünya çempionu Səid Mollayi 3-5 noyabr tarixlərində Fransanın Monpelye şəhərində keçiriləcək Avropa çempionatında iştirak edə bilməyəcək.

Bu barədə Prosport.Az-a Azərbaycan Cüdo Federasiyasının baş katibi Rəşad Rəsullu məlumat verib.

Onun sözlərinə görə, 2018-ci ildə Bakıda dünya çempionu olmuş 31 yaşlı cüdoçu zədə üzündən yarışa qatıla bilməyəcək. Yalnız gələn həftədən etibarən məşqlərə başlayacaq Mollayinin dekabrda Yaponiyanın paytaxtı Tokioda keçiriləcək "Böyük Dəbilqə" turnirində iştirakı gözlənilir.

Səid Mollayinin əvəzinə isə 73 kq çəki dərəcəsində 23 yaşlı Rəşid Məmmədəliyev Avropa çempionatına aparılacaq. U-23-lər arasında Avropa çempionu və Avropa Kubokunun qalibi olmuş Rəşid bu il özünü yaxşı tərəfdən göstərə bilib. O, Çində keçirilmiş Universitet Oyunlarında gümüş və yenicə başa çatmış Əbu-Dabi "Böyük Dəbilqə" turnirində bürünc medal qazanıb.

Qeyd edək ki, Azərbaycan millisi Avropa çempionatında 11 cüdoçu ilə təmsil olunacaq. Kişilərdə Balabəy Ağayev, Turan Bayramov (hər ikisi 60 kq), Yaşar Nəcəfov (66 kq), Hidayət Heydərov, Rəşid Məmmədəliyev (hər ikisi 73 kq), Zelim Tçkayev (81 kq), Murad Fətiyev (90 kq), Zelim Kotsoyev (100 kq), Uşanqi Kokauri (+100 kq), qadınlarda Leyla Əliyeva (48 kq) və Gültac Məmmədəliyeva (52 kq) mübarizə aparacaq.