Azərbaycan Milli Antidopinq Agentliyinin (AMADA) rəhbərliyində dəyişiklik baş verib. 

Prosport.Az xəbər verir ki, Şəfəq Hüseynli direktor vəzifəsindən azad edilib.

AMADA-nın yeni tərkibdə Müşahidə Şurasının ilk iclası keçirilib. İclasda millət vəkili, "Bakı Şəhər Halqası"nın sabiq mətbuat xidmətinin rəhbəri Nigar Arpadarai şuranın sədri, hüquqşunas Samir Nuriyev isə sədr müavini seçilib. İnarə Ağabalayeva, Şahin Bayramov və Namiq Məmmədov Müşahidə Şurasının üzvü olub.

Həmçinin Agentliyin Nizamnaməsinin 4.4.2-ci bəndinə əsasən, Təhminə Tağızadə AMADA-nın icraçı direktoru təyin edilib. Əldə etdiyimiz məlumata görə, Təhminə Tağızadə Azərbaycan Dövlət Bədən Tərbiyəsi və İdman Akademiyasının Elmi işlər üzrə prorektoru vəzifəsində çalışır. Onun həmçinin tibb təhsili var, Azərbaycan Cərrahlar Assosiasiyası və Azərbaycan Səhiyyə Kommunikasiyası Assosiasiyasının aktiv üzvüdür. 

Xatırladaq ki, AMADA Azərbaycan Prezidenti İlham Əliyevin Fərmanı ilə 2016-cı ildə yaradılıb. Şəfəq Hüseynli ilk vaxtlardan qurumun direktoru vəzifəsində çalışırdı.