Cüdo hakimi Ülvi Əliyev B kateqoriyalı hakim statusu qazanıb.

Prosport.Az-ın məlumatına görə, İspaniyanın Malaqa şəhərində Avropa Cüdo Birliyi (EJU) tərəfindən hakimlər üçün B kateqoriyalı beynəlxalq dərəcəli hakim adının alınması üçün imtahan keçirilib. İmtahanda Azərbaycan Cüdo Federasiyasının (ACF) hakimlər heyətinin üzvü Ülvi Əliyev də iştirak edib.

İlkin olaraq hakimlər nəzəri hissəyə dair 60 sualdan ibarət imtahandan keçib. Daha sonra 14-15 oktyabrda keçirilən böyüklər arasında Avropa Kubokunun görüşləri idarə edərək praktiki imtahan veriblər. Həm nəzəri, həm də praktiki imtahanı yüksək nəticə ilə keçən Ülvi Əliyev B kateqoriyalı beynəlxalq hakimlik lisenziyasını əldə edib.

ACF həm milli, həm də beynəlxalq səviyyədə hakimlərin peşəkarlıq səviyyəsinin artırılması, o cümlədən A və B kateqoriyalı beynəlxalq dərəcəli hakimlərin sayının çoxaldılması istiqamətində sistemli və ardıcıl fəaliyyətini davam etdirəcək.