Qadın həndbolçulardan ibarət Azərbaycan millisi 2024-cü ildə keçiriləcək Avropa çempionatının seçmə mərhələsində mübarizəyə məğlubiyyətlə başlayıb.

Prosport.Az xəbər verir ki, Yelena Namaliyevanın məşqçi kimi oyuna çıxardığı yığmamız ilk görüşünə səfərdə çıxıb.

Komanda Skopyedə Şimali Makedoniya ilə üz-üzə gəlib. Qarşılaşma rəqibin böyük hesablı qələbəsi ilə yekunlaşıb – 40:17.

Qeyd edək ki, Azərbaycan millisi oktyabrın 14-də Bakı İdman Sarayında İspaniya, 2024-cü il fevralın 28-də isə Litva ilə qarşılaşacaq.

Həmçinin 17 yaşadək qızlardan ibarət millimiz də Kosovonun paytaxtı Priştinada Beynəlxalq Həndbol Federasiyasının Avropa zonası üzrə keçirdiyi "IHF Trophy" turnirində biabırçı məğlubiyyətlə üzləşib. Komandamız yerli Kosovoya 8:49 hesabı ilə uduzub.

Onu da bildirək ki, 15 oktyabradək davam edəcək bu yarışda Kosovo və Azərbaycandan başqa, Bolqarıstan, Albaniya, Bosniya və Herseqovina, Böyük Britaniya və Gürcüstan yarışır. Azərbaycan Kosovo və Bolqarıstanla bərabər A qrupunda yarışır. Ən yaxşı qrup 2-ciləri yarımfinala vəsiqə qazanacaq. Yarışın qalibi isə "IHF Trophy" turnirinin qitələrarası mərhələsinə vəsiqə qazanacaq.