Azərbaycan avarçəkəni Diana Dımçenko İtaliyanın Barletta şəhərində keçirilən sahil avarçəkməsi üzrə dünya çempionatının gümüş medalını qazanıb.

Prosport.Az xəbər verir ki, o, yalnız irlandiyalı Monika Dukarskayadan geri qalaraq, 2-ci yeri tutub.

Ukrayna əsilli Dımçenko təsnifat mərhələsində finişə 1-ci çatıb. İdmançı 4 min metr məsafəni 20:11.72 dəqiqəyə qət edib. Final yürüşündə idmançılar 6 min metr məsafəyə yarışıb. Diana bu məsafəni 32:20.94 dəqiqəyə başa vurub. O, fransalı Jesika Beranı (32.33.92) 13 saniyə fərqlə geridə qoyaraq, dünya çempionatını 2-ci pillədə tamamlayıb. Çempion Monika Dukarskaya isə 32:09.17 nəticə göstərib.

Qeyd edək ki, Diana Dımçenko ötən il Uelsdə təşkil olunan sahil avarçəkməsi üzrə dünya çempionatında da 2-ci yeri tutmuşdu.