Azərbaycan Ağır Atletika Federasiyasının növbədənkənar seçkisi baş tutub.

Prosport.Az-ın xəbərinə görə, Qazaxdan olan sabiq millət vəkili, "Azərbaycan Sənaye Korporasiyası" Açıq Səhmdar Cəmiyyətinin baş direktoru Kamran Nəbizadə bundan sonra federasiyanın prezidenti vəzifəsini icra edəcək.

Həmçinin, Azərbaycan Güləş Federasiyasının sabiq vitse-prezidenti və sərbəst güləş millimizin sabiq baş məşqçisi, "Sərhədçi" Peşəkar İdman Klubunun rəhbəri Firdovsi Umudov və Mirsəməd Mövsümzadə federasiyanın vitse-prezidenti seçilib.

Həmçinin, federasiyanın adı dəyişdirilib. Qurum bundan sonra Azərbaycan Ağırlıqqaldırma Federasiyası adlandırılacaq.

Qeyd edək ki, apreldə İnam Kərimovun Ali Məhkəmənin sədri təyin olunmasından sonra federasiya prezidenti postu boş idi. Federasiyaya müvəqqəti olaraq İnam Kərimovun nazir olarkən müşaviri işləmiş, federasiyada İdarə Heyətinin üzvü olan Anar Hüseynov rəhbərlik edirdi.