"Komanda Sumqayıt şəhərini təmsil etdiyindən, bizim loqodan istifadəsində heç bir problem yoxdur, bu, icazəli şəkildədir".

Bunu Prosport.Az saytına açıqlamasında "Sumqayıt" FK-nın mətbuat xidmətinin rəhbəri Zaur Xudiyev bildirib.

O bildirib ki, yeni yaradılan basketbol klubunun futbol klubuna aidiyyatı olmasa da, müəyyən məsləhət xarakterli dəstək göstərilib:

"Bu komandanın öz idarəetmə strukturu, öz maliyyə dayaqları olacaq. "Sumqayıt" BK "Sumqayıt" FK tərəfindən maliyyələşdirilməyəcək. İsmayıl Əfəndiyev basketbol komandasına rəhbərlik edəcək. Basketbol klubunun yaradılmasına bizim rəhbərlik tərəfindən yalnız məsləhət xarakterli dəstək verilib, maddi dəstəkdən söhbət gedə bilməz".

11:33

Azərbaycan Basketbol Liqasında (ABL) 2023/2024 mövsümündə iştirak edəcək son 2 klubun adları və loqoları müəyyənləşib.

Azərbaycan Basketbol Federasiyasından Prosport.Az-a verilən məlumata görə, bunlar Bakını təmsil edəcək "Xəzri" və Sumqayıt şəhərinin eyniadlı komandasıdır.

"Xəzri" "Baku Gesko" adı ilə çempionatda debüt edəcəyi gözlənilən komandadır. Düşünmək olar ki, yeni yaradılan "Sumqayıt" basketbol klubu "Sabah" kimi futbol klubuna bağlı olacaq. Çünki futbol və basketbol klublarının loqoları eynidir. Əslində bu praktika ötən mövsüm "Sabah" basketbol klubunun nümunəsində var.

Ancaq "Sumqayıt" FK-nın mətbuat xidmətinin rəhbəri Zaur Xudiyev saytımıza bu klubla bir bağlılıqlarının olmadığını bildirdi. Belə olan halda düşünmək olar ki, futbol klubunun loqosundan basketbol komandasını yaradanlar məharətlə yararlanıb.

Qeyd edək ki, yeni mövsümdə 10 komanda mübarizə aparacaq. Bunlar yuxarıda adı çəkilən 2 komandadan başqa, "Sabah", NTD, "Gəncə", "Xırdalan", "Sərhədçi", "Neftçi", "Cəlilabad" və "Şəki"dir.