Bakıda keçirilən paracüdo üzrə Qran Pri yarışı başa çatıb.

Prosport.Az-ın məlumatına görə, ilk dəfə Milli Gimnastika Arenasında keçirilən yarış Azərbaycan üçün çox uğursuz olub.

Belə ki, yalnız 2 paralimpiya çempionumuz – Şəhanə Hacıyeva (J2, 48 kq) və Xanım Hüseynova (J2, 70 kq) bürünc medal almaqla kifayətlənib.

Halbuki, ötən il Bakıda keçirilmiş dünya çempionatında İlham Zəkiyev gümüş, Namiq Abbaslı, Şəhanə Hacıyeva və Xanım Hüseynova isə bürünc medal qazanmışdı. Həmin yarışın Qran Pri yox, dünya çempionatı olduğunu nəzərə alsaq, bu nəticəni o qədər də pis adlandırmaq olmazdı. Ancaq Azərbaycanın 2 il əvvəl Yaponiyanın paytaxtı Tokioda keçirilmiş Yay Paralimpiya Oyunlarında 19 medaldan 8-ni (14 qızıl medaldan 6-sı) paracüdo idmançılarının qazandırdığını nəzərə alsaq, Bakıda keçirilmiş nəticəni kifayət qədər aşağı və uğursuz adlandırmaq mümkündür.

Nəzərə alaq ki, bu yarışa bəzi idmançılar viza səbəbindən gələ bilməyib. Məsələn, Xanım Hüseynovanın yarışdığı çəkidə yalnız 4 idmançı mübarizə aparıb. Bununla belə, ölkəmizdə keçirilən yarışda cəmi 2 medal çox-çox az deyilmi?!

Artıq böyük idmanda olduğu kimi, paralimpik idmanda da enişin olması düşündürücü məqamdır. Bir az silkələnmək zamanıdır, xanımlar və cənablar!