Azərbaycanlı basketbolçu Hüseyn Qaflanov sentyabrın 28-də ABŞ-yə yollanacaq.

Prosport.Az xəbər verir ki, gənclərdən ibarət millinin üzvü Azərbaycan Basketbol Federasiyasının dəstəyi ilə karyerasını daha yüksək səviyyədə davam etdirmək üçün bu addımı atacaq.

Gənclərdən ibarət yığmanın baş məşqçisi Tahir Baxşıyevin kəşfi sayılan 15 yaşlı idmançı 1 il müddətində Cənubi Kaliforniya Akademiyasında (SCA) təhsil alacaq və basketbol üzrə hazırlıq kurslarını keçəcək.

Hazırlıq prosesində 210 santimetr boya malik Hüseyn Qaflanova peşəkar yerli mütəxəssislər tərəfindən elit bacarıq təlimləri ilə yanaşı, atletik keyfiyyətlərin və sağlamlıq performansının artırılmasına dair proqramlar da tətbiq olunacaq.