“Öz ölkəmdə həmişə böyük dəstək hiss edirəm. Bu mənə enerji verir və daha da həvəsləndirir. Mən heç bir zaman stress hiss etmirəm, əksinə, ilhamla mübarizə aparıram və nəinki özümün, həm də pərəstişkarlarımın ümidlərini doğrultmağa və onları sevindirməyə çalışıram".

Prosport.Az xəbər verir ki, bu gün 73 kq çəki dərəcəsində Bakıda keçirilən cüdo üzrə "Böyük Dəbilqə" turnirinin qalibi olmuş Hidayət Heydərov deyib.

O, Beynəlxalq Cüdo Federasiyasının saytına müsahibə verib: "Bir vaxtlar mən də tribunalarda azarkeşlik edirdim. Çempionlarımız – Elnur Məmmədli ilə Elxan Məmmədovun güləşlərinə baxırdım. İndi mən millinin lideriyəm və ikiqat məsuliyyət hiss edirəm. Arzum budur ki, gənc nəsil özlərinə inansın, məşq etməyə davam etsin və dünya şöhrətli idmançılar yetişsin.

İndi bütün diqqət Olimpiadaya hazırlığa yönəlib. Qarşıda hələ Avropa çempionatı olacaq, mən orada yenidən qalib olmaq istəyirəm. Lakin Yay Olimpiya Oyunları daha çox vacibdir. Azərbaycan cüdosunda 16 illik olimpiya qızıl medal həsrətinə son qoymaq üçün əlimdən gələni edəcəyəm”.