Qadın basketbol millimizin Avropa çempionatındakı rəqibləri məlum olub.

Prosport.Az xəbər verir ki, bu gün İsveçrənin Nyon rayonunun Mi qəsəbəsində 2025-ci il qadınlar arasında baş tutacaq basketbol üzrə Avropa çempionatının seçmə mərhələsinin püşkatma mərasimi keçirilib. Püşkün nəticələrinə əsasən millimiz C qrupunda Belçika, Litva və Polşa yığmalarına rəqib olub.

Qadın yığmamız tarixində ilk dəfə iştirak edəcəyi Avropa çempionatının seçmə mərhələ görüşlərində qrupdakı ilk oyununu 9 noyabrda səfərdə Litva millisinə qarşı keçirəcək. Millimizin 2-ci qrup oyunu isə 12 noyabr Bakıda Belçika yığmasına qarşı olacaq.

8 qrup qalibi və 4 ən yaxşı qrup 2-cisi Avropa çempionatına vəsiqə qazanacaq.

Qeyd edək ki, Avropa çempionatının final mərhələsi 2025-ci ildə Çexiya, Almaniya, Yunanıstan və İtaliyada baş tutacaq. Bu 4 komanda da formal olaraq I qrupunda mübarizə aparacaq.