15-17 sentyabr tarixində “International Surfcasting Friendship Cup” çərçivəsində Polşanın Vvadısvovo şəhərinin Baltik dənizi sahilində “International Surfcasting Maver Cup Poland” adlı surfkast növü üzrə balıq ovlama turniri təşkil olunub.

Prosport.Az xəbər verir ki, turnirdə Azərbaycan, Yunanıstan, Polşa, İtaliya və Kiprdən 36 komandanın ümumilikdə 72 idmançısı iştirak edərək məharətlərini nümayiş etdirib.

Balıqçılar Baltik dənizi sahilində ümumilikdə 2 mərhələ üzrə 10 saat yarışıb. Azərbaycanı bu turnirdə 2 komanda, 4 idmançı – Mehdi Mehdiyev, Çingiz Qəniyev, Vüqar Mirzəyev və Elbrus Əsədullayevlə təmsil edib. Ölkəmizi ilk dəfədir ki, beynəlxalq idman balıq ovu turnirində təmsil edən idmançılarımız layiqli mübarizə aparıb. Fərdi növdə Mehdi Mehdiyev tutduğu balıqlarla xal toplayaraq qaliblər kürsüsünə çıxıb. O, 72 idmançı arasında 164 xal toplayaraq 3-cü yeri tutub və bayrağımızı dalğalandırıb.

Həmçinin, Azərbaycan komandası Yunanıstan və Kiprdən sonra 3-cü yerə sahib çıxıb.