"Heç nə ilə məşğul olmuram. Qəşəng evimdə istirahət edirəm. Arada simli alətlər – tar, ud, gitara çalıram".

Bunu Prosport.Az saytına açıqlamasında gənclər və idman nazirinin sabiq müavini İsmayıl İsmayılov bildirib.

67 yaşlı idman mütəxəssisi hazırda işsiz olduğunu, ancaq əvvəl işlədiyi Bədən Tərbiyəsi və İdman Akademiyasında yenidən çalışmaq istədiyini bildirib:

"Mən 1996-2006-cı illərdə Bədən Tərbiyəsi və İdman Akademiyasında elmi işlər üzrə prorektor vəzifəsində işləmişdim. Nazirlikdən çıxanda mənə o vəzifə yenidən təklif olundu (hazırda o vəzifədə yunan-Roma güləşi üzrə Olimpiya çempionumuz Fərid Mansurovdur – S.M.). Amma... Bununla belə, orada müəllim kimi işləmək təklif olunsa, bunu istəyərəm. Mən "Bədən tərbiyəsi nəzəriyyəsi və metodikası"nı idman məşqçi və müalicə bədən tərbiyəsi" ixtisasını bitirmişəm. Akademiyanı bitirən məzunların, məşqçi-müəllimlərin bilik səviyyələrini yüksəltmək lazımdır. Belə olan halda onlar da hər bir idmançının hazırlığına fərdi yanaşa biləcək".

Qeyd edək ki, İsmayıl İsmayılov 2006-2021-ci illərdə gənclər və idman nazirinin müavini vəzifəsində çalışıb.

Səbuhi Musa