Azərbaycanı ilk dəfə Avropada təmsil edəcək "Xarı Bülbül Şuşa" kişi voleybol komandasının "Çelenc Kuboku"nda keçirəcəyi oyunların məkanı bəlli olub.

Prosport.Az-ın xəbərinə görə, Şuşanı təmsil edən komanda Slovakiyanın "Spartak" (Miyava) komandası ilə hər 2 oyununu Azərbaycanda – Bakıda keçirəcək.

Hər 2 klubun qarşılıqlı razılaşmasına əsasən matçlar 25 və 26 oktyabrda paytaxtımızda – Dərnəgül qəsəbəsində yerləşən Azərbaycan Voleybol Mərkəzində baş tutacaq. Halbuki, 19 iyulda atılmış püşkatmaya əsasən 24-26 oktyabrda ilk oyun Azərbaycanda, 31 oktyabr – 2 noyabrda cavab matçı Miyava şəhərində olmalı idi.

Qeyd edək ki, "Xarı Bülbül Şüşa" bu oyunlara hazırlıq məqsədi ilə sentyabrın 29-u Polşaya yola düşəcək və həmin ölkənin cənub-şərqində yerləşən Kelnarova kəndində 12 gün təlim-məşq toplanışında olacaq. Toplanış zamanı bir sıra yoxlama oyunlarının da keçirilməsi nəzərdə tutulub.