Bu gün şose velosipedinin kriterium növü üzrə Azərbaycan Kuboku yarışının II mərhələsinə start verilib.

Prosport.Az xəbər verir ki, Lənkəran şəhərində keçirilən turnirin ilk günündə 2010-2011-ci il təvəllüdlü oğlanlar (13 nəfər) 5 km, 2009 (14 nəfər) və 2006-2008-ci il təvəllüdlü oğlanlar (19 nəfər) isə 10 km məsafəyə fərdi ötüşmə növündə mübarizə aparıblar.

Start və finiş yeri Bayraq Meydanının yaxınlığında olan yarışda idmançılar Heydər Əliyev prospekti ilə hərəkət ediblər.

2010-2011-ci il təvəllüdlü oğlanlar arasında Timur Rəcəbov (ROEQİUGVM, 09:07:32) bütün rəqiblərini qabaqlayaraq 1-ci, Nizami Cavadlı (Təhsil RİM, 09:45:61) 2-ci, Artyom Sokolov (ROEQİUGVM İsmayıllı, 09:53:46) 3-cü yerə layiq görülüb.

2009-cu il təvəllüdlü oğlanların mübarizəsində Çingiz İsayev (ROEQİUGVM, 16:30:78) qızıl, Nihad Xudoyev (ROEQİUGVM, 16:47:15) gümüş, Tunar Sadıqlı (Təhsil RİM, 16:58:58) bürünc medal qazanıb.

2006-2008-ci il təvəllüdlü oğlanların yarışında isə Tural İsrafilov (ROEQİUGVM, 14:05:75) fəxri kürsünün ən yüksək pilləsinə qalxıb. Artyom Proskuryakov (Təhsil RİM, 15:18:41) 2-ci, Ravi Rzayev (ROEQİUGVM, 15:53:12) 3-cü yerlə kifayətləniblər.

Yarışdan sonra mükafatlandırma mərasimi keçirilib. Qaliblərə medal, diplom və qiymətli hədiyyələr təqdim edilib. İdmançılara mükafatları Lənkəran Şəhər İcra Hakimiyyəti başçısının müavini – İctimai-siyasi və humanitar məsələlər şöbəsinin müdiri Ülviyyə Əliyeva, Lənkəran-Astara Regional Gənclər və İdman İdarəsinin rəisi Teymur Babazadə və Azərbaycan Velosiped Federasiyasının (AVF) baş katibi Elnarə Musayeva təqdim edib.

AVF-nin Gəncə şəhərində fəaliyyət göstərən filialının idmançıları ilk dəfə olaraq rəsmi ölkədaxili yarışa qatılıb. Onlarla yanaşı, İsmayıllı velosipedçiləri də turnirdə uğurlu mübarizə ilə yadda qalıb.