Almaniyanın Düseldorf şəhərində keçirilən polo üzrə XIV Avropa çempionatında millimiz 2-ci qələbəsini qazanıb.

Prosport.Az-ın məlumatına görə, Elçin Camallı, Tərlan Qurbanəliyev, Xoakin Kopelyo və Andres Ernesto Lorentonun təmsil olunduqları millimiz bu dəfə son Avropa çempionu – İtaliyaya 6:1 hesabı ilə qalib gəlib. Çempionatın ən yaxşı oyunçusu hesab olunan komandamızın kapitanı Elçin Camallı bu dəfə 4 qolu öz aktivinə yazdırıb.

Xatırladaq ki, 2018-ci ildə İtaliyanın Syena şəhərində keçirilən Avropa çempionatında Azərbaycan millisi keçirdiyi bütün oyunlarda böyük hesabla qələbə qazanmasına baxmayaraq, final oyununda ev sahibləri italyanlara 4:8 hesabı ilə məğlub olaraq qızıl medaldan məhrum olub. Həmin çempionatı 2-ciliklə bitirən millimiz üçün bu qarşılaşma revanş almaq üçün gözəl imkan olub və idmançılarımız bu imkandan məharətlə istifadə edib.

Beləliklə, millimiz son turda İsveçrə ilə oynamasına baxmayaraq, artıq yarımfinalda oynamaq haqqını qazanıb, eləcə də qrupda 1-ci yeri təmin edib. Belə ki, sabah keçiriləcək digər oyunun nəticəsinə əsasən qrupun 2-ci yeri də müəyyən olunacaq.

Sabah saat 10:30-da Azərbaycan və İsveçrə millilərinin formal xarakterli oyunu baş tutacaq.