Qadın həndbolçulardan ibarət “Kür” klubunun EHF Avropa Kubokunun III mərhələsindəki rəqibi müəyyənləşib.

Prosport.Az xəbər verir ki, Azərbaycan təmsilçisi Şimali Makedoniyanın “Çair” klubu ilə üz-üzə gələcək.

Etnik albanların qurduğu Skopye təmsilçisi 2024/2025 mövsümündə Avropa Kubokunda tarixinin ən yaxşı nəticəsinə imza ataraq ilk dəfə 1/8 finala yüksəlib.

“Kür” isə hazırkı mövsümdə klub tarixinin rekordunu müəyyənləşdirib. Mingəçevir təmsilçisi II raundda Kiprin APOEL klubunu hər 2 oyunda böyük hesabla məğlub edib – 40:18 və 39:13. Turnirin ilk raundu keçirilməyib. Bu qələbələr sayəsində “Kür” tarixində ilk dəfə avrokuboklarda qalib gəlib və III mərhələyə vəsiqə qazanıb.

Qeyd edək ki, III mərhələnin oyunları noyabrın 7-8-də Skopyedə və 14-15-də Mingəçevirdə keçiriləcək. Lakin tərəflər razılaşsa, hər iki oyun II mərhələdə olduğu kimi, bu tarixlərdən birində Mingəçevirdə keçirilə bilər.

"Kür"ün kişi komandası isə 23-24 oktyabrda EHF Avropa Kubokunun II mərhələsi çərçivəsində Mingəçevirdə Bosniya və Herseqovinanın "Sloqa" komandasını qəbul edəcək.