4-11 oktyabr 2026-cı il tarixlərində Milli Gimnastika Arenasında təşkil olunan dünya çempionatında Azərbaycan 1 qızıl, 2 gümüş və 4 bürünc olmaqla ümumilikdə 7 medal qazanıb.
Prosport.Az xəbər verir ki, Əhməd Yusifov (60 kq) dünya çempionu olub, Zelim Çkayev (81 kq) və Uşanqi Kokauri (+100 kq) gümüş, Rəşid Məmmədəliyev (73 kq), Ömər Rəcəbli (81 kq), Murad Fətiyev (90 kq) və Kənan Nəsibov (+100 kq) isə bürünc medala sahib çıxıblar.
Azərbaycan bu nəticə ilə 93 ölkənin yer aldığı medal sıralamasında 3-cü yeri tutub. Bu, milli komandamızın böyüklər arasında dünya çempionatlarında həm medal sayı, həm də yekun medal sıralamasındakı mövqeyi baxımından ən yüksək göstəricisidir.
Bunadək Azərbaycan cüdosunun bir dünya çempionatında medal sayı üzrə ən yaxşı nəticəsi 2017-ci ildə Budapeştdə qeydə alınmışdı. Həmin mundialda yığmamız 2 gümüş və 2 bürünc olmaqla 4 medal qazanmışdı. Bakı-2026-da əvvəlki rekord 3 medal yaxşılaşdırılıb.
2024-cü ildə Əbu-Dabidə keçirilən dünya çempionatında Hidayət Heydərov və Zelim Kotsoyev 2 qızıl medal qazanaraq Azərbaycan üçün bir mundialda qızıl medal sayı üzrə rekord müəyyənləşdirmişdilər. Bakı-2026-da isə bir qızıl medalla yanaşı, daha 6 mükafatın əldə olunması milli komandanın dünya çempionatları tarixində ən geniş medal nəticəsini təmin edib. Əbu-Dabi-2024-də Azərbaycan ümumi medal sıralamasında 4-cü olduğu halda, Bakıda 3-cü pilləyə yüksəlib.
Nəticələrin çəki dərəcələri üzrə bölgüsü də mundialın əsas göstəricilərindən biri olub. Kişilərdən ibarət milli komanda 7 çəki dərəcəsindən 5-də – 60 kq, 73 kq, 81 kq, 90 kq və +100 kq-da medal qazanıb. Azərbaycan cüdosu dünya çempionatlarında ilk dəfə kişilərin 5 müxtəlif çəki dərəcəsində fəxri kürsüdə təmsil olunub.
Bakı mundialı daha bir tarixi nəticə ilə yadda qalıb. İlk dəfə eyni dünya çempionatında 2 müxtəlif çəki dərəcəsində 3 Azərbaycan cüdoçusu medal əldə edib. 81 kq-da Zelim Çkayev gümüş, Ömər Rəcəbli bürünc, +100 kq-da isə Uşanqi Kokauri gümüş, Kənan Nəsibov bürünc medala yiyələniblər.
Buna qədər eyni dünya çempionatında bir çəkidə 2 Azərbaycan təmsilçisinin fəxri kürsüyə yüksəlməsi yalnız bir dəfə qeydə alınmışdı. 2019-cu ildə Tokioda 73 kq çəki dərəcəsində Rüstəm Orucov gümüş, Hidayət Heydərov isə bürünc medal qazanmışdı.
Əhməd Yusifovun qələbəsi Azərbaycan cüdosu üçün ayrıca tarixi əhəmiyyət daşıyır. O, böyüklər arasında 60 kq çəki dərəcəsində dünya çempionu olan ilk azərbaycanlı cüdoçu kimi tarixə düşüb. Yusifov eyni zamanda Azərbaycan cüdosunun 4-cü dünya çempionu olub.
Buna qədər Elxan Məmmədov 2013-cü ildə Rio-de-Janeyroda, Hidayət Heydərov və Zelim Kotsoyev isə 2024-cü ildə Əbu-Dabidə dünya çempionu titulunu qazanmışdılar. Beləliklə, Azərbaycan cüdosunun böyüklər arasında dünya çempionatlarında qazandığı 4 qızıl medaldan 3-ü son 3 ildə – 2024 və 2026-cı illərdə əldə olunub.
Bakı-2026 5 cüdoçumuz üçün karyeralarının ilk dünya çempionatı medalı ilə də əlamətdar olub. Əhməd Yusifov, Rəşid Məmmədəliyev, Ömər Rəcəbli, Murad Fətiyev və Kənan Nəsibov böyüklər arasında mundialda ilk dəfə fəxri kürsüyə yüksəliblər. Onlardan Ömər Rəcəbli və Kənan Nəsibov bunu böyüklər arasında iştirak etdikləri ilk dünya çempionatındaca bacarıblar.
Zelim Çkayev dünya çempionatlarındakı nəticəsini daha da yaxşılaşdırıb. 2025-ci ildə Budapeştdə ilk dünya çempionatı medalını – bürünc mükafatı qazanan cüdoçu bu dəfə finala qədər irəliləyərək gümüş medala sahib olub.
Uşanqi Kokauri isə karyerasında 2-ci dəfə böyüklər arasında dünya çempionatının gümüş medalını qazanıb. +100 kq çəki dərəcəsində çıxış edən cüdoçumuz ilk dəfə 2018-ci ildə, yenə Bakıda keçirilən mundialda 2-ci olmuşdu. Beləliklə, Kokauri 8 il sonra eyni şəhərdə dünya çempionatının finalına qayıdaraq 2-ci gümüş medalını əldə edib.
Azərbaycanın 7 medallıq nəticəsi keçmiş SSRİ respublikalarının müstəqillik dövründə dünya çempionatlarındakı göstəriciləri fonunda da seçilir. Bu ölkələr arasında bir mundialda Azərbaycandan daha çox medal qazanan yeganə komanda Rusiyadır. Rusiya 2014-cü ildə Çelyabinskdə keçirilən dünya çempionatının fərdi yarışlarında 2 gümüş və 6 bürünc olmaqla 8 medal əldə etmişdi. Azərbaycan Bakı-2026-da 7 medalla bu göstəricidə ikinci ən yüksək nəticəyə imza atıb. Fərq ondadır ki, Rusiyanın Çelyabinskdəki 8 fərdi medalının heç biri qızıl olmadığı halda, Azərbaycanın Bakıdakı kolleksiyasında dünya çempionluğu da yer alıb.
Beləliklə, Bakı-2026 Azərbaycan cüdosu üçün bir dünya çempionatında ən çox medal, ən yüksək yekun medal sıralaması, kişilər arasında ən çox medal qazanılan çəki dərəcəsi, 60 kq-da ilk dünya çempionluğu, eyni mundialda iki müxtəlif çəkidə iki medalçı və beş yeni dünya çempionatı medalçısı kimi bir sıra tarixi göstəricilərlə yadda qalıb.