Millimiz Almaniyanın Düsseldorf şəhərində keçirilən at polosu üzrə XIV Avropa çempionatına qələbə ilə başlayıb.

Prosport.Az xəbər verir ki, ilk qrup oyunları baş tutub.

Heyətində kapitan Elçin Camallı, oyunçular Tərlan Qurbanəliyev, Xoakin Kopelyo və Andres Ernesto Lorentonun yer aldığı millimiz ilk qrup oyununu turnirin favoritlərindən sayılan İspaniya yığmasına qarşı keçirib. Komandamız 6:5 hesabı ilə qələbə qazanaraq aktivinə 1 xal yazdırıb. Gərgin mübarizədə kapitan Elçin Camallı qollardan 2-ni öz aktivinə yazdıraraq dubl edib.

Millimizin çıxış etdiyi A qrupunun digər oyununda isə İtaliya millisi İsveçrə üzərində 6:2,5 hesabı ilə inamlı qələbə qazanıb. İlk görüşün nəticələrinə əsasən İtaliya və Azərbaycan yığmaları aktivlərində 1 xalla qrupda ilk 2 sıranı bölüşür, İspaniya 3-cü, İsveçrə isə 4-cü yerdə qərarlaşıb.

Komandamız qrupun 2-ci matçını bu gün yerli vaxtla saat 14:00-da son Avropa çempionu İtaliyaya qarşı keçirəcək. Həlledici adlandırıla biləcək matça yığmamızın eyni heyətlə çıxması planlaşdırılıb.

B qrupu oyunlarının nəticələri isə aşağıdakı kimi olub: Niderland – Avstriya 5:8,5, İngiltərə – Almaniya 4:8.