"Özümü idmansız, məşqsiz təsəvvür edə bilmirəm. Bu idman məni yaşadır". 

Bunu Prosport.Az-a açıqlamasında 4-cü dəfə veteranlar arasında dünya çempionu olmuş Mövlud Mirəliyev deyib.

Daxili İşlər Nazirliyi İdman Cəmiyyətinin rəisi, Xüsusi Olimpiya Komitəsinin prezidenti Mövlud Mirəliyev M5 kateqoriyası üzrə 100 kq çəki dərəcəsində 5 rəqibini məğlub edərək növbəti dəfə dünya çempionu olub.

52 yaşlı veteran idmançı idmansız qala bilməməsindən və bu səbəbdən də Bosniya və Herseqovinanın paytaxtı Sarayevoda keçirilmiş dünya çempionatına qatılmasından danışıb: "Cüdo işimə çox böyük motivasiya verir. Mən peşəkar idmançı karyeramı bitirsəm də, cüdonu hələ də yaşamaq istəyirəm. Hər bir yarışdan qabaq həyəcan olur. Mən hər zaman bu həyəcan hissini minimum ildə 1-2 dəfə yaşamaq niyyətindəyəm. Ona görə də məşqlərimi davamlı şəkildə edirəm. Onsuz qala bilmərəm.

Veteranların dünya çempionatı olsa da, bura hazırlıqsız gəlmək olmaz. Buradan sürpriz idmançılar çıxır. Rusiyalı Aleksandr Qaltsev və finaldakı polşalı Pavel Sitarski ilə görüşlərim çətin keçdi. Onlar yaxşı idmançılar idi".

Səbuhi Musa