"Bu gün (1 sentyabr – red.) mənim üçün özəl bir gündür. 25 il bundan əvvəl tam da bu gün cüdo ilə ilk tanışlığım oldu. Və elə bu gün də karyeramın bitdiyini elan edirəm. Geridə fəxrlə yola saldığım bu uzun illəri bu karyeraya həsr etdiyim üçün çox xoşbəxtəm!"

Prosport.Az xəbər verir ki, bunu karyerasını başa vuran cüdoçu Orxan Səfərov bildirib.

32 yaşlı cüdoçu vida sözləri zamanı hamıya təşəkkür edib: "Azərbaycan bayrağını dalğalandırmaq mənim üçün böyük şərəf idi. Mübarizəmi davam etdirmək üçün mənə güc, motivasiya verən ailəmə, dostlarıma, məşqçilərimə və cüdo sevərlərə təşəkkürümü bildirirəm.

Bu gün peşəkar cüdoçu kimi son günümdür. Cüdoya mənə qatdığı hər şeyə görə minnətdaram!

Birlikdə çalışdığım hər kəsə, rəhbərliyə, məşqçilərə, həkimlərə və klublara təşəkkür edirəm.

İndi isə həyatımda yeni səhifə açmaq zamanıdır. Hələlik!"

Qeyd edək ki, Orxan Səfərov 2013-cü ildə böyüklər arasında dünya çempionatında bürünc medal, 2017-ci ildə isə gümüş medal qazanıb. 2015 və 2016-cı illərdə Avropa çempionatının gümüş, 2017-cı ildə isə bürünc medala sahib olub. 2020-ci ildə isə Avropa çempionu olub. “Masters” turnirində 1 dəfə qızıl, 1 dəfə gümüş medal qazanmaqla yanaşı, o, "Böyük Dəbilqə" və Qran Pri yarışlarında ümumilikdə 15 medal qazanıb.