Azərbaycanın gənc cüdoçulardan ibarət millisi öncəki Avropa çempionatından daha yaxşı çıxışla yadda qalıb.

Prosport.Az-ın xəbərinə görə, oğlan komandamız baş məşqçi Rüstəm Alimlinin rəhbərliyi altında bu dəfə Monteneqronun paytaxtı Podqoritsada keçirilən Avropa çempionatında 3 qızıl və 2 bürünc medal qazanıb.

Belə ki, 9 oğlan və 5 qız idmançı ilə yarışa qatılan komandamızda Ayxan Mirzəzadə (60 kq), Məhəmməd Musayev (66 kq), Süleyman Şükürov (90 kq) qızıl, Davud Namazlı (100 kq) və Ramazan Əhmədov (+100 kq) bürünc medal qazanıb.

Baş məşqçi Əminə Əbdüllətifin rəhbərliyi altında qız komandamız yenə ümidləri doğrultmasa da, oğlan komandamızın tək medalları yox, ağır çəki dərəcələrində də uğurlara yiyələnməsi bizi sevindirməyə bilməz. Xüsusən +100 kq-da Ramazan Əhmədovun medalı gələcəyə ümidlə yanaşmağa əsas verir.

İştirakçı 44 ölkə arasında (400 idmançı yarışırdı) ümumi komanda hesabında Azərbaycanın Fransadan sonra 2-ci, oğlan komanda hesabında isə 1-ci olması da xüsusi vurğulanmalı məqamdır.

Bəs ötən il Slovakiyanın paytaxtı Bratislavada keçirilmiş analoji Avropa çempionatında nəticəmiz necə olmuşdu?

43 ölkədən 364 idmançının yarışdığı həmin Avropa çempionatına komandamız 13 idmançı ilə qoşulmuşdu. Həmin gün yalnız ilk gündə medallar olmuşdu. 60 kq-da Nihad Məmişov Avropa qızıl medalını qazanmışdı. Məhəmməd Musayev (66 kq) onda ilk dəfə gənclərdə Avropa çempionu adına yiyələnmişdi. Nizami İmranov (66 kq) isə son dəfə çıxış etdiyi gənclərin Avropa çempionatını bürünc medalla başa vurmuşdu.

Bu nəticə ilə ümumi komanda hesabında Azərbaycan İtaliya və Fransanın ardınca 3-cü yeri tutmuşdu. Oğlanların yarışında isə 1-ci yer yenə Azərbaycanın olmuşdu.