Futzal millimizin baş məşqçisi müəyyənləşib.

Prosport.Az-ın xəbərinə görə, bu, Elvin Quliyev olacaq.

41 yaşlı məşqçi "Turan Eyr", TT, "Neftçi" İSM, "Əmrahbank", "Baku Fayr" kimi tanınmış futzal klublarında oynayıb. 2002-ci ildə "Turan Eyr"lə ölkə çempionu, 2009 və 2012-ci ildə "Neftçi" ilə, 2023-cü ildə isə "Baku Fayr"la Azərbaycan Kubokunun qalibi olub.

O, çimərlik futbolu üzrə millimizdə çıxışları ilə də tanınır. Elvin Quliyev minifutbol üzrə milli komandada Elşad Quliyevin köməkçilərindən biri vəzifəsini icra edib. O, son olaraq "Sabah"ın 15 yaşadək komandasının baş məşqçisi vəzifəsində işləyib.

Onun millidəki maaşı 5 min manat təşkil edəcək. Bu vəzifə üçün Elnur Qəmbərov və Rizvan Fərzəliyevə də müraciət olunsa da, müəyyən səbəblərdən onlar bu təkliflə razılaşmayıb. Millini bunadək sabiq baş məşqçi Yevgeni Kukseviçin köməkçilərindən olmuş Fərid Ələkbərov məşq etdirirdi.  

Qeyd edək ki, millimizin dünya çempionatının seçmə mərhələsi çərçivəsində Çexiya və Latviya ilə oyunları var. İlk matç oktyabrın 16-da keçiriləcək.