Futzal üzrə son ölkə çempionu "Araz-Naxçıvan"ı tarixdə ilk dəfə 2 məşqçi çalışdıracaq.

Prosport.Az-ın xəbərinə görə, bu post Fərid Ələkbərovla Rəcəb Fərəczadəyə tapşırılıb.

Onlar komandanı Polşanın Qlivitse şəhərində oktyabrın 27-dən noyabrın 1-dək keçiriləcək UEFA Çempionlar Liqasının əsas mərhələsinin 5-ci qrup oyunlarına hazırlaşdıracaq. Burada Naxçıvan klubunun rəqibləri meydan sahibi "Piast", "Buba Mara" (Bosniya və Herseqovina) və "Uypeşt"dir (Macarıstan).

Qeyd edək ki, "Araz-Naxçıvan" Futzal Federasiyası prezidenti Zaur Axundovun maliyyə vəziyyətinin pisləşməsinə görə dağılmaq ərəfəsində olub. Lakin Axundov son anda klubun fəaliyyətinə yardım edəcəyini öhdəsinə götürüb.

Xatırladaq ki, "Araz-Naxçıvan"ın əvvəlki baş məşqçisi rusiyalı Yevgeni Kukseviç olub. Millidə də baş məşqçi işləyən Kukseviçin müqaviləsi bu yay başa çatıb. Hazırda məşqçilər korpusunda yer alan Fərid Ələkbərov və Rəcəb Fərəczadə onun köməkçiləri olub.

Səbuhi Musa