Azərbaycanın çimərlik güləşçisi Camal Feyziyev (+90 kq) Bakıda keçirilən Dünya Seriyasının IV mərhələsində çempion olduğu üçün sevindiyini bildirib.

Prosport.Az xəbər verir ki, idmançı Azərbaycan Güləş Federasiyasının mətbuat xidmətinə açıqlamasında doğma məkanda azarkeşlər qarşısında qalib gəlməyin xüsusi olduğunu deyib.

Feyziyev daha əvvəl yunan-Roma güləşi, cüdo və sumo ilə məşğul olduğunu, sumo üzrə 10 qat Avropa çempionu olduğunu bildirib. Finalda məğlub etdiyi ukraynalı Vaja Dayauri ilə sumoda daha əvvəl 5 dəfə qarşılaşdığını və 3 dəfə qalib gəldiyini qeyd edib. Dayauri sumo üzrə dünya çempionudur.

İdmançı uğurunda federasiyanın dəstəyi və baş məşqçi Oyan Nəzərianinin rəhbərliyi ilə keçirilən iki aylıq təlim-məşq toplanışının böyük rol oynadığını vurğulayıb.

Camal Feyziyev növbəti hədəfinin Yunanıstanda keçiriləcək Dünya Seriyasının final mərhələsində qalib gəlmək və dünya çempionu olmaq olduğunu söyləyib.

Qeyd edək ki, Azərbaycan çimərlik güləşçiləri Bakıda keçirilən yarışda 7 medal qazanıblar. Vüsal Əliyev (80 kq), Əşrəf Aşırov (90 kq) və Camal Feyziyev (+90 kq) qızıl medal əldə ediblər. Sahib Dadaşov (80 kq) və Nərgiz Səmədova (60 kq) gümüş, Cavid Niftəlizadə (80 kq) və Ramiz Həsənov (90 kq) isə bürünc medal qazanıblar.

Azərbaycanın kişilərdən ibarət millisi 84 xalla komanda hesabında birinci olub.