“Bakıya gələn qonaqlar hələ bu səviyyədə dünya çempionatı təşkil edilmədiyini dedilər”.
Prosport.Az xəbər verir ki, bunu Azərbaycan Atıcılıq Federasiyasının (AAF) baş katibi Emin Cəfərov Bakıda təşkil olunan dünya çempionatı ilə bağlı jurnalistlərə açıqlamasında deyib.
Federasiya rəsmisi başa çatmaqda olan mundialın yüksək səviyyədə təşkil edildiyini bildirib: “Bu, Azərbaycanda keçirilən atıcılıq üzrə ən böyük idman tədbiri oldu. 1239 idmançı mübarizə apardı. Bu vaxta kimi belə statistika qeydə alınmayıb. Eyni zamanda mundialda 101 ölkə yarışdı ki, bu da rekorddur. Bakını tərk edənlər həm elektron poçt ünvanımıza, həm də şəxsi hesabımıza təşəkkür mesajları yazırlar. Bu bizim üçün çox xoşdur. İndi rahat deyə bilərik ki, 5 il əvvəl Cənubi Koreyada keçirilən dünya çempionatından daha yüksək səviyyədə yarış təşkil etmişik. Bunu biz deyil, iştirakçılar bildirirlər. Bizim üçün çox xoşdur”.
Emin Cəfərov Azərbaycan idmançılarının nəticələrini yüksək qiymətləndirib: “Bu yarış bizim üçün uğurlu oldu, 3 medal əldə etdik. Dünya çempionatlarındakı sonuncu qızıl medalımızı 2001-ci ildə Qahirədə keçirilən yarışda Zemfira Meftəhəddinova qazanmışdı. Həmin dönəmdən bəri “qızıl”ımız yox idi. Son dünya çempionatında 2 medal qazanmışdıq ki, onların 1-i gümüş, 1-i bürünc idi. Bu il sayı 3-ə çatdırdıq. Say baxımından yavaş-yavaş irəliləyirik. Ümid edirik ki, növbəti yarışda daha çox medalımız olacaq. Medal qazanmasalar da, gənclərimiz bizi çox sevindirdilər. Nəticələri göz özündədir, irəliləyirlər. Gənclər arasında keçirilən dünya çempionatında 2 medalımızın olduğunu nəzərə alsaq, yığmamızın mundiallarda qazandığı ümumi medal sayı 5 olur. Bizim üçün çox yaxşı nəticədir”.
Baş katib dünya çempionatında çox sayda rekord qeydə alındığını sözlərinə əlavə edib: “13 dünya rekordu təkrarlanıb. Bu göstəricilər həm güllə, həm də stend atıcılığında qeydə alındı. Çinli idmançının 25 metr məsafəyə tapança ilə cəld atəş yarışında 40 cəhddən 39-nu dəqiq yerinə yetirməsi tarixi rekord idi. Düşünürəm ki, bunu uzun müddət yeniləmək mümkün olmayacaq. Çünki finalda 40 atəşin hamısını dəqiq yerinə yetirmək çox çətindir. Bu göstərici yəqin ki, hələ uzun müddət tarixdə qalacaq”.
Qeyd edək ki, dünya çempionatının son günlərində qeyri-olimpiya növləri üzrə yarışlar keçiriləcək.