“Sea Breeze”də keçirilən çimərlik güləşi üzrə Dünya Seriyasının IV mərhələsi Azərbaycan güləşçisi Vüsal Əliyev (80 kq) fəxri kürsünün ən yüksək pilləsinə qalxaraq qızıl medal qazanıb.

Güləşçi qalibiyyətindən sonra Prosport.Az-a müsahibə verib.

– Yarışla bağlı fikirləriniz necədir?
– Bu yarışa biz çox yaxşı hazırlaşmışdıq. İlk seriyadan etibarən baş məşqçimiz Oyan Nəzərianinin rəhbərliyi altında təlim-məşq prosesindəyik, çox yaxşı hazırlıq keçdik. Şükürlər olsun ki, bu çempionluq mənə qismət oldu. Komanda yoldaşlarımla birlikdə hazırlaşırdıq. Həmişə yanımda olan və mənə dəstək verən komanda yoldaşım Camal Feyziyevlə də bir yerdə məşq edirdik.

– Komanda yoldaşınızla finalda qarşılaşmaq necə hissdir?
– Çox qəribə hissdir. İllərdir bir zalda məşq etdiyimiz, bir yerdə hazırlaşdığımız komanda yoldaşımızla qarşılaşmaq asan deyil. Təbii ki, heç birimiz bir-birimizə qalib gəlmək istəməzdik. Amma bu, idmandır və bunu başqa cür etmək olmur. Allah 1 nəfərə qızıl medalı qismət edir. Şükürlər olsun ki, bu mənə qismət oldu.

– Final mərhələsində də iştirak edəcəksiniz. Dünya çempionu olmaq şansınızı necə qiymətləndirirsiniz?
– Qeyd edim ki, mən ötən il 80 kq-da da dünya çempionu olmuşam. Bu il də həmin nəticəni təkrarlamaq istəyirəm. İnşallah, Allah qismət edərsə, ötən il olduğu kimi bu il də dünya çempionu olmaq, 2-ci dəfə dünya çempionluğunu qazanmaq istəyirəm.

– Burada yarışmağınız o demək deyil ki, sərbəst güləşdə də yarışmayacaqsınız?
– Bəli, sərbəst güləşdə də yarışa bilərəm. Hər iki növ üzrə şəraitimiz var və müəllimlərimiz də bizə yarışmaq imkanı verir.

Səbuhi Musa