Azərbaycan Premyer Liqasının III turunda “Zirə” doğma meydanda “Neftçi”ni 1:0 hesabı ilə məğlub edib.

Matçdan sonra “Zirə”nin futbolçusu Ayxan Hüseynov Prosport.Az-a müsahibə verib.

— Oyunla bağlı fikirləriniz necədir?

— Bilirdik ki, çox çətin oyuna çıxırıq. “Neftçi”nin bizə qarşı yaxşı hazırlaşdığını bilirdik, amma biz də yaxşı hazırlaşmışdıq. Yaxşı və maraqlı oyun keçdi. Məncə, qələbəyə daha yaxın tərəf biz idik və şükürlər olsun ki, qalib gəldik. Təəssüf ki, yaratdığımız qol epizodlarından istifadə edə bilmirik. Bunun üzərində çox işləməliyik. Yaxşı epizodlara giririk, onları qola çevirməliyik.

— Konfrans Liqasında da komandanız çoxlu qol imkanları yaradırdı, amma bunlardan istifadə etməkdə çətinlik çəkirdiniz. Ümumiyyətlə, epizodlardan bu qədər az istifadə olunmasının səbəbi nədir?

— Özümüz də bilmirik. Konfrans Liqasında da, çempionatın ilk oyunlarında da çoxlu qol epizodları yaradırıq, amma nədənsə vura bilmirik. Komandamızda hamısı yaxşı və səviyyəli futbolçulardır. Əslində, məşqlərdə belə epizodlarda çox asan qol vururuq. Amma nədənsə oyunlarda alınmır. Bunun üzərində işləyəcəyik. İnşallah, ən yaxın zamanda həmin epizodları qola çevirəcəyik.

— Ayxan Abbasov tribunadan oyuna baxırdı. Milli komandadan dəvət gözləyirsiniz?

— Ayxan müəllimin oyuna gələcəyini və matçı izləyəcəyini bilmirdim. Mən əlimdən gələni edirəm, çalışıram. İlk növbədə komandama kömək etməliyəm. Bundan sonra milliyə dəvət alsam, orada da bacardığımı edəcəyəm. Hələ qarşıda çətin oyunlar var. “Qarabağ”, “Sabah”, “Turan Tovuz” ... İlk növbədə həmin oyunları düşünməliyik. Sonrasına, inşallah, baxarıq.

— Növbəti turda “Sabah”la qarşılaşacaqsınız. Bu oyun barədə nə deyə bilərsiniz?

— “Sabah” haqqında nə deyə bilərik? Çətin rəqibdir. Çempionlar Liqasında oynayan komandadır, onları təbrik edirəm. Amma biz də maksimum çalışacağıq. Meydana çox motivasiyalı çıxacağıq. İnşallah, yaxşı oyun keçirərik.

Bahar Rüstəm