Olimpiya, dünya və Avropa çempionları yetişdirmiş Respublika Olimpiya İdman Liseyi baxımsız vəziyyətdədir.

Prosport.Az xəbər verir ki, Bakıxanov qəsəbəsində yerləşən idman ocağı yararsız duruma düşdüyündən, təmirə ehtiyacı var.

Sakinlər arasında "internat məktəbi" kimi tanınan lisey 2 ildir ki, təmirə bağlı qaldığından, uşaq və yeniyetmə idmançılar da çətin vəziyyətlə üzləşib və burada məşq keçmək imkanından məhrum olublar.

Qeyd edək ki, Respublika Olimpiya İdman Liseyi 1963-cü ildə ittifaq respublikaları arasında ilk dəfə olaraq məhz Azərbaycanda yaradılıb. Azərbaycan SSR Maarif Nazirliyinin tabeliyində olarkən idman internat məktəbi olan bu yer 1989-cu ildən Respublika Olimpiya Ehtiyat Məktəbi adlandırılıb və İdman Komitəsinin balansına verilib. 15 mart 2000-ci il tarixdə Gənclər, İdman və Turizm Nazirliyinin müraciəti ilə məktəbin təmayülü üzrə statusunu genişləndirmək üçün Nazirlər Kabinetinin 46 saylı qərarına əsasən internat məktəb Respublika Olimpiya İdman Liseyi adlandırılıb. Bura tanınmış idmançılarımızdan cüdoçular – Elnur Məmmədli, Nicat Şıxəlizadə, güləşçilər – Eldəniz Əzizli, Taleh Məmmədov kimi idmançıları yetişdirib.