Bakıda keçirilən çimərlik güləşi üzrə U-17 dünya çempionatında Azərbaycana ilk qızıl medalı Elcan Həsənov (60 kq) qazandırıb.
O daha sonra Prosport.Az-a müsahibə verib:
– Görüş haqqında fikirlərinizi bilmək maraqlı olardı. Finalda həmyerliniz Əlirza Heybətl ilə qarşılaşdınız və qalib gəldiniz...
– Yarış çox yüksək səviyyədə təşkil olunub. Rəqiblərimin hamısı bir-birindən güclü idi. Finalda öz həmyerlimlə qarşılaşdım. Bu, mənim üçün fəxr idi. Şükür Allaha, doğma vətənimizdə Azərbaycan himnini səsləndirmək mənə nəsib oldu.
– Bu çempionluqla 31 oktyabr – 13 noyabr tarixlərində Seneqalda keçiriləcək Yeniyetmələrin Olimpiya Oyunlarında iştirak hüququ əldə etdiniz. Heyətdə 1 nömrə olmaq üçün hazırlaşırsınız?
– Bəli, bunun üçün hazırlaşırıq. Məşqlərimizi daha da artıracağıq. İnşallah, Allah nəsib eləsin, Seneqalda olimpiya çempionluğu qazanım.
– Ümumiyyətlə, necə oldu ki, çimərlik güləşinə keçdiniz?
– Mən keçən ildən Oyan müəllimlə (baş məşqçi Oyan Nəzərianini nəzərdə tutur – red.) bir yerdə məşq edirdim. Ötən il dünya çempionatında uduzmuşdum. 1 il ərzində Oyan müəllim və İbrahim müəllimin (köməkçi məşqçi İbrahim Yusubovu nəzərdə tutur – red.) dəstəyi ilə hazırlaşdım. Şükür Allaha, bu il həm Avropa, həm də dünya çempionu oldum.
– Dünya çempionatında sərbəst güləşdə uduzmuşdunuz?
– Bəli, sərbəst güləşdə.
– Sərbəst güləş üzrə karyeranızı bitirmisiniz, yoxsa davam etdirirsiniz?
– Xeyr, davam etdirirəm. Orada dünya çempionu olmaq mənə nəsib olmadı. Oyan müəllim sağ olsun, mənə dəstək verdi, İbrahim müəllim dəstək oldu. Məşqlərimi artırdım. İnşallah, bundan sonra da uğurlar qazanaram.
– Yəni həm sərbəst, həm də çimərlik güləşində çıxış etmək istəyirsiniz?
– Bəli, hər ikisində davam edəcəyəm. Düzdür, çox çətindir. Həm sərbəst, həm də çimərlik güləşi ilə məşğul olmaq asan deyil. Ancaq çalışıram ki, hər ikisində layiqincə çıxış edim və ölkəmizi yaxşı təmsil edim.
– Qum üzərində güləşin sərbəst güləşdən əsas fərqi və çətinliyi nədədir?
– İlk növbədə deyərdim ki, sərbəst güləş fərqlidir, çimərlik güləşi isə qum üzərində keçirilir və çox çətindir. Sərbəst güləşdə müxtəlif fəndlərdən istifadə etmək, diz üstə yerə oturmaq mümkündür. Burada isə daha diqqətli olmalısan. Bir səhv rəqibə xal qazandıra bilər. Buna görə də daha diqqətli olmaq lazımdır.
– Yarışın Bakıda keçirilməsi sizin üçün əlavə üstünlük oldu?
– Bəli, mənə müsbət təsir bağışladı. Daha layiqli çıxış etmək istədim və əlavə motivasiya aldım. Müəllimlərim sağ olsunlar, hamısı məni motivasiya etdi. Yarışın vətənimizdə keçirilməsi mənim üçün xüsusi idi. Ölkəmizin himnini səsləndirmək istəyirdim. Çox şükür, buna nail oldum.
Səbuhi Musa
