Bu gün Qubada 2015-ci il təvəllüdlü futbolçular arasında III “Ulduz Cup” beynəlxalq futbol turniri start götürüb.
Açılış mərasimindən sonra Ulduz Futbol Akademiyasının direktoru Mehman Əlimov jurnalistlərin suallarını cavablandırıb.
– Mehman müəllim, ilk növbədə turnir barədə...
– İlk öncə sizi Quba şəhərində xoş gördük. Bildiyiniz kimi, “Ulduz Cup” beynəlxalq futbol turniri artıq üçüncü dəfədir Azərbaycanda keçirilir. İlk dəfə Zaqatalada təşkil olunmuşdu və turnirdə 4 beynəlxalq, 4 yerli komanda iştirak etmişdi. Ötən il isə 8 beynəlxalq və 4 yerli olmaqla, ümumilikdə 12 komanda mübarizə aparmışdı. Bu il keçirilən III “Ulduz Cup”da 7 beynəlxalq və 5 Azərbaycan komandası iştirak edir. Ümumilikdə 12 komanda 3 qrupda mübarizə aparacaq. Turnir 2015-ci il təvəllüdlü uşaqlar arasında keçirilir. Yarış Gənclər və İdman Nazirliyi, Ulduz Futbol Akademiyası və AFFA-nın təşkilatçılığı ilə keçirilir. İnşallah, gözəl turnir alınar. Güclü olan qazansın.
– Yəqin ki, əsas məqsəd uşaqlar arasında futbola olan marağı daha da artırmaq və beynəlxalq inteqrasiyanı təmin etməkdir.
– Bəli, bu beynəlxalq turnirin keçirilməsində əsas məqsədlərdən biri Azərbaycan futbolunu qlobal futbol aləminə tanıtmaq və ölkəmizdə futbolun kütləviliyini artırmaqdır. İnşallah, bizim uşaqlarımız, Azərbaycan komandaları beynəlxalq səviyyədə uğurla çıxış edərlər, xarici klublarda oynayar və öz ölkələrini layiqincə təmsil edərlər.
– Yəni hər halda əsas məqsəd sırf nəticə deyil...
– Güclü olan qazansın. Bu, uşaq futboludur və burada əsas məsələ inkişafdır. Təbii ki, turnirin sonunda birinci və ikinci yerləri tutan komandalar kubokla təltif olunacaq. Amma ümumi məqsəd futbolun inkişafı və futbola marağın, kütləviliyin artırılmasıdır.
– Ulduz Futbol Akademiyasının rəhbəri olaraq siz bu inkişafı hiss edirsinizmi? Üçüncü dəfədir komandanız turnirdə iştirak edir. Akademiyada və komandada əvvəlki illərlə müqayisədə fərq varmı?
– Bəli. Ulduz Futbol Akademiyasını 2020-ci ildə Gənclər və İdman Nazirliyinin dəstəyi ilə yaratmışıq. Əvvəlcə 4 komandamız var idi, hazırda isə artıq 11 komandamız fəaliyyət göstərir. Bu komandalar AFFA bayrağı altında keçirilən bütün liqalarda iştirak edirlər. Ümumiyyətlə, təkcə Qubada beynəlxalq turnir təşkil etmirik. Bizim 2015-ci il təvəllüdlü komandamız Bolqarıstanda və Trabzonda beynəlxalq yarışlarda iştirak edib. 2012-ci il təvəllüdlü komandamız Gürcüstanda olub. Bundan əlavə, avqustun əvvəlində U-16 qızlar komandamız Qırğızıstanda keçirilən beynəlxalq turnirdə qələbə qazandı və qızıl medallara layiq görüldü.
Bahar Rüstəm