"Artıq 3 ilə yaxındır ki, “Kəpəz”dən ayrılmışam. Buna baxmayaraq, komandanın bu durumunda da hər zaman onun yanındayıq, dəstəkləmişik. Məğlubiyyətinə üzülmüş, qələbəsinə sevinmişik. "Kəpəz"də lazım gələndə, hətta pulsuz çalışmışam, komandanın ağır günündə yanında olmuşam. İnsan yaxşı gündə hər kəsin yanında olur. Biz isə pis günün dostlarıyıq. Pis gündə də komandanın yanında olmuşuq və bu günə qədər də yanındayıq".

Bunu Prosport.Az-a açıqlamasında "Kəpəz"in sabiq azarkeş rəhbəri və mühafizə rəisi olmuş Elmar Əliyev deyib.

O, 2023-cü ilin oktyabrında klubdan ayrıldıqdan sonra başqa sahədə çalışdığını bildirib: "Hazırda tikinti sektorunda çalışıram və ailəmi dolandırıram. Amma “Kəpəz” mənim ürəyimdir. “Kəpəz”lə bağlı həmişə demişəm ki, bu böyük şəhərin bir yox, bir neçə sponsoru olmalıdır. İstərdik ki, komanda bu ayın sonunda "Turan Tovuz"la keçirəcəyi derbi oyununda yaxşı nəticə qazansın. Bütün azarkeşləri komandaya dəstək olmağa dəvət edirəm.

Pis günün ömrü az olar. Mən hər zaman imkanlı şəxslərə çağırış edirəm ki, “Kəpəz” diqqətdən kənarda qalmamalıdır. “Kəpəz” həmişə yüksək yerlərdə olub və azarkeşlər də bunu gözləyir. Bilirsiniz ki, əvvəllər bütün klublar “Kəpəz”lə oynamağa gələndə deyirdilər: “Kəpəz bizə 2, 3, hətta 4 qol vuracaq”. Təəssüflər olsun ki, neçə illərdir həmin “Kəpəz” yoxdur. Biz istəyirik ki, komanda əvvəlki əzəmətini qaytarsın.

Bu gün “Kəpəz”in baş məşqçisi də gəncəlidir — Azər Məmmədov. O, həm ədəb-ərkanlı, özünə hörmət edən insandır, həm də yaxşı baş məşqçidir. Hamımız gəncəli olaraq əl-ələ verməli, "Kəpəz"i ayağa qaldırmaq üçün əlimizdən gələni etməliyik. Yeni rəhbərlik gəlib, onlara da uğurlar arzulayırıq. İnanırıq ki, yeni rəhbərlik bütün gücü ilə komandaya dəstək olacaq və “Kəpəz” köhnə əzəmətini qaytaracaq. Bizim arzumuz budur".