Yeni formalaşan “Gəncəbasar” klubunun bu gün ictimaiyyət üçün təqdimat mərasimi keçirilib.

Prosport.Az xəbər verir ki, təqdimat mərasimindən sonra klubun icraçı direkoru İlqar Nadiri jurnalistlərin suallarını cavablandırıb.

– Necə oldu ki, "Cəbrayıl" klubunu "Gəncəbasar"a çevirdiniz?
– Son 1 ildə bununla bağlı müzakirələr gedirdi. Bu müzakirələrin sonu olmalı idi. Bu günə qismət oldu. "Cəbrayıl" klubunu aldıq və adını dəyişdik. Bu gün Gəncədə 2-ci klubun yaranmasının təməli qoyuldu.

– Klubun hədəfi nə olacaq?
– Klub yeni yaranıb. Struktur formalaşdırmaq istəyirik. Gəncə böyük şəhərdir. İstəyirik ki, burada 2-ci klub olsun və özünəməxsus iz qoysun. Gələcəyə doğru addımlar atmağı planlaşdırırıq.

– Komanda ev oyunlarını harada keçirəcək?
– Uzun müddətdir ki, müzakirələr gedir. Oyunlarımızı Gəncə şəhər stadionunda keçirəcəyik. Ehtiyat stadion kimi də Yevlax şəhər stadionu gündəmdədir.

– Gəncə şəhər stadionunda "Kəpəz" də ev oyunlarını keçirəcək. 2 komandanın oynamasına görə meydançanın ot örtüyü pis vəziyyətə düşməyəcək?
– Bununla bağlı hər hansı risk olsa, Yevlax şəhər stadionundan istifadə edəcəyik. Mənim "Kəpəz"də rəhbərlik etdiyim dönəmdə bu praktikadan istifadə etmişik, Qəbələdə oynamışıq. Böyük şəhərlərdə böyük komandaların bir stadionunun olması normaldır.

– Ev oyunlarınızı Göygöl və ya Mingəçevirdə keçirmək variantı da vardı...
– Göygöldəki (Olimpiya İdman Kompleksinin stadionu) şərait I Liqanın oyunları üçün uyğun deyil. Hazırda məşqlərimizi orada keçiririk. Amma oyunların keçirilməsi üçün Göygöl variantı müzakirə mövzusu deyil.