Azərbaycanın yeniyetmə cüdo millisi Xorvartiyanın paytaxtı Zaqrebdə keçirilən dünya çempionatında fərdi yarışları medal sıralamasına görə 1-ci pillədə başa vurub.

Prosport.Az xəbər verir ki, yığma üzvləri turnirdə 8 mükafat (2 qızıl, 3 gümüş, 3 bürünc) qazanıb. Fərdi yarışların sonuncu günündə Ramazan Əhmədov (+90 kq) bürünc medal əldə edib. 

Beləliklə, ondan başqa, Nihad Məmişov (50 kq), Xədicə Qədəşova (52 kq) qızıl, Məhəmməd Məmişov (50 kq), Məhəmməd Musayev (60 kq), Əbil Yusubov (66 kq) gümüş, Mirxaliq İskəndərov (55 kq) və Süleyman Şükürov (73 kq) bürünc medal sahibi olub.

Yaponiya millisi 2 qızıl və 1 gümüş medalla 2-ci sıradadır. Azərbaycan kollektivi mükafatların sayına görə də lider olub.

Qeyd edək ki, bu gün komandalararası yarış baş tutacaq.