Azərbaycan taekvondoçusu Həşim Məhəmmədov Avropa çempionu tituluna sahib olub.

Prosport.Az xəbər verir ki, 58 kq çəki dərəcəsində mübarizə aparan idmançı Estoniyanın paytaxtı Tallində Olimpiya çəki dərəcələri üzrə qitə çempionatında fəxri kürsünün ən yüksək pilləsinə qalxıb.

İlk mərhələdən azad olan 24 yaşlı taekvondçu mübarizəyə 1/8 finaldan qoşulub. O, ilk görüşdə danimarkalı Riski Farnesi məğlub edib. Məhəmmədov ardınca Xristiyan Georgiyevə (Bolqarıstan) eyni aqibəti yaşadıb. Taekvondoçumuz yarımfinalda Lev Korneyev (Serbiya) üzərində də inamlı qələbə qazanıb. Həşim finalda niderlandlı Amyen Axnini sınağa çəkib. Gərgin keçən döyüşdə teakvondoçumuz rəqibinə heç bir şans verməyərək Avropa çempionatının qızıl medalına yiyələnib və Tallində Azərbaycan himnini səsləndirib.

Bununla da yığmamızın Olimpiya çəki dərəcələri üzrə qitə çempionatında medallarının sayı 3-ə yüksəlib. Həşim Məhəmmədovdan öncə Cavad Ağayev (68 kq) və Həmidrza Bədriəliabadi (+80 kq) gümüş medala yiyələnib. Baş məşqçi Məmməd Abdullayevin rəhbərlik etdiyi yığma 1 qızıl və 2 gümüş medalla kişi komandaları arasında 2-ci yeri tutub. 1-1-ci pillədə Ukrayna qərarlaşdığı halda, “3-lüy”ü Almaniya qapayıb.

Estoniyada eyni zamanda keçirilən gənclərin Avropa çempionatını isə komandamız 2 medalla başa vurub. Səlimə Quliyeva (42 kq) gümüş, Məhəmməd Həsənli (45 kq) bürünc mükafat qazanıb.

Beləliklə, 3 gün davam edən 2 Avropa çempionatında Azərbaycan taekvondoçuları 1 qızıl, 3 gümüş və 1 bürünc medalla başa vurub. Azərbaycan millisi ümumi komanda hesabında da Avropanın ən güclüləri sırasına düşüb. Taekvondoçularımızın uğurlu çıxışı yığmamızın 3-cü olması ilə nəticələnib. İlk 2 yeri Serbiya və Ukrayna tutub.