Azərbaycan Premyer Liqasının I turunda "Qarabağ" "Şamaxı"nı 3:1 hesabı ilə məğlub edib.

Matçdan sonra "Qarabağ"ın üzvü Marko Yankoviç Prosport.Az-a müsahibə verib.

– Oyunla bağlı fikirləriniz?
– Çempionatın ilk matçına çıxdıq. Bizim üçün 3 xal qazanmaq çox vacib idi. Bunu bacardıq. Oyuna gəldikdə, səhvlərimiz də oldu, bəzi məqamlarda yaxşı çıxış etdik. Məqsədimiz UEFA Konfrans Liqasının pley-off oyunu öncəsi özümüzə inamı qaytarmaq idi. Buna nail olduq. Sözsüz ki, ilk oyunda səhvlər olur.

– Konfrans Liqasında Liqa mərhələsinə vəsiqə qazanacağınıza inam nə dərəcədədir?
– Faiz nisbəti ilə dəyərləndirmək ciddi olmaz. Təbii ki, komandamızın mərhələ adlayacağına inanıram. Daha əvvəl nəyə qadir olduğumuzu sübut etmişik. Böyük klublara qarşı oyun təcrübəmiz var. İnanmasaydıq, heç səfər oyununa getməzdik. Təbii ki, “Tvente”yə qalib gələcəyimizə inanırıq.

– Digər klublardan təklif almısınız? “Qarabağ”da qalacaqsınız?
– Mənim “Qarabağ”la hələ 1 illik müqaviləm var. Bu klubun futbolçusuyam.

– Türkiyə Super Liqasına vəsiqə qazanan “Çorum” klubunun sizinlə yaxından maraqlandığı, lakin həyat yoldaşınızın həmin şəhəri bəyənməməsi səbəbindən keçidin baş tutmadığı deyilir. Bu, nə dərəcədə doğrudur?
– Xeyr, bu, yanlış məlumatdır.

Bahar Rüstəm