Azərbaycan Premyer Liqasının I turunda “Zirə” “Şəfa”nı 2:0 hesabı ilə məğlub edib.
Matçdan sonra “Zirə”nin qapıçısı Aydın Bayramov Prosport.Az-a müsahibə verib.
– Oyunla bağlı fikirləriniz?
– Bilirdik ki, bizə qarşı motivasiyalı olacaqlar. Premyer Liqada ilk oyunlarıdır. Onlara da uğurlar arzulayıram, yaxşı komanda yığıblar. Şükürlər olsun ki, qələbə ilə başladıq, yaxşı oynadıq.
– Tyaqonun gedişi və yeni qapıçının zədələnməsi əsas heyətdə çıxışınızı sürətləndirdi?
– Məntiqi sonluq budur (gülür). Mən nə deyə bilərəm ki? Yaxşı rəqabət var. İnşallah, Maykon da tez sağalar. Futboldur, belə şeylər olur. Tyaqoya da gələcək karyerasında uğurlar arzulayıram.
– Bu mövsüm üçün hədəfiniz nədir?
– Minimum Avropa Liqasına düşmək. Çünki çətin mövsüm gözlənilir. Digər rəqiblərə də baxsaq, həm yeni Premyer Liqaya çıxan komanda, həm aşağıda olanlar, həm də Avropa uğrunda oynayan komandalar çox yaxşı komplektləşib.
– Çempionluq hədəfi var?
– Nə qədər yuxarı gedə bilsək, o qədər yaxşıdır.
– Bu mövsüm rəqabət daha çox olacaq. Mövsüm boyu komandanın və özünüzün performansını necə görürsünüz?
– Bu, ilk tur idi. Digər oyunlara və bu matça baxsaq, görürük ki, çox mübariz oyunlar olacaq. Kim daha çox mübarizə aparacaqsa, ən çox o qazanacaq. Gələn turlarda da eyni bu oyun kimi, hamısına qələbə üçün çıxacağıq.
– “Zirə” növbəti avrokuboklara çıxış etmək gücündədir? Heyətin hazırlığı buna imkan verir?
– “Zirə” hər il onsuz da avrokuboklarda çıxış etmək gücündədir. Hər il bunun uğrunda oynayır.
– "Şəfa"dakı həmkarınızın (Nicat Mehbalıyev nəzərdə tuturlur) çıxışını necə qiymətləndirirsiniz?
– Uğurlar arzulaya bilərəm. Yaxşı çıxış etdi, yaxşı oynadı. Əslində, mənə düşmür onun haqqında nəsə demək. Biz həmkarıq, mən də qapıçıyam, o da qapıçıdır. Onun haqda məşqçilər heyəti və siz jurnalistlər nəsə deyə bilərsiniz. Ancaq dostumdur, yaxşı ünsiyyətimiz var. Ona uğurlar arzulaya bilərəm.
– Növbəti turlarda komandadakı durumunuz milliyə nə dərəcədə təsir edə bilər? Əvvəllər milli komandaya çağırılanda ehtiyatda qalırdınız, bu dəfə isə aktiv oynayırsınız. Qarşıda Millətlər Liqasının oyunları var...
– Düzdür, milli komandada oynamaq hər bir futbolçunun arzusudur, həmçinin mənim də. Amma bundan əvvəlki vaxtlarda da klubda az oynasam da, çağırılmışdım, həm də oynamışdım. İndi klubda stabil çıxış edirəm. Məşqçilər heyəti çağırıb-çağırmamağa qərar verəcək. Orada oynamaq və ya oynamamaq isə sonranın işidir.
– Növbəti matç “İmişli”yə qarşı olacaq. Gözləntiləriniz nədir?
– Ancaq qələbə. Yaxşı hazırlaşırıq. “İmişli”yə qarşı 3 oyun keçirmişik. 3-ü də heç-heçə olub. “İmişli” bizim üçün çətin rəqibdir, yaxşı mübarizə aparan komandadır. Çalışacağıq ki, yaxşı hazırlaşıb bu tilsimi qıraq və qələbə qazanaq.
Bahar Rüstəm