Azərbaycan badmintonçuları Bakıda keçirilən “Azerbaijan Junior Open 2026” beynəlxalq turnirində uğurlu çıxış edərək 1 qızıl, 2 gümüş və 1 bürünc medal qazanıb.

Prosport.Az xəbər verir ki, ilk dəfə “Junior International Series” kateqoriyasında təşkil olunan yarışda 9 ölkədən (Azərbaycan, Türkiyə, Hindistan, ABŞ, Birləşmiş Ərəb Əmirlikləri (BƏƏ), İran, Özbəkistan, Gürcüstan və Tacikistan) 64 idmançı mübarizə aparıb.

Kişilərin qoşa yarışında Ülvi Hüseynov – Əmirxan İmanov tandemi finalda hind idmançılardan ibarət ABŞ təmsilçilərini 2:0 (21:16, 23:21) hesabı ilə məğlub edərək turnirin qalibi olub.

Qadınların qoşa yarışında Leyla Camalzadə – Yağmur Quliyeva cütü hind idmançılardan ibarət BƏƏ-ni təmsil edən cütə, kişilərin şəxsi yarışında isə Ülvi Hüseynov isə İran idmançısına 0:2 uduzaraq gümüş medalla kifayətlənib.

Qarışıq qoşa yarışında Əmirxan İmanov – Yağmur Quliyeva tandemi isə bürünc medala sahib çıxıb.

Turnirin ümumi mükafat fondu 5 min ABŞ dolları (8 500 manat) təşkil edib.

Qeyd edək ki, Dünya Badminton Federasiyasının (BWF) rəsmi təqviminə daxil olan yarışın əsas məqsədi yeniyetmə və gənc badmintonçuların beynəlxalq təcrübəsini artırmaq, onların peşəkar inkişafına dəstək vermək və milli komandada rəqabət mühitini gücləndirməkdir.