Avqustun 14-15-də şose velosipedi üzrə Ölkə Kuboku yarışı keçirilib.

Prosport.Az xəbər verir ki, yarış Azərbaycan Respublikasının Gənclər və İdman Nazirliyi ilə Azərbaycan Velosiped İdmanı Federasiyasının 2026-cı il üçün təsdiqlədiyi idman təqvim planına əsasən təşkil olunub.

Yarışın ilk günündə Pirallahı rayonunda fərdi ötüşmə üzrə qaliblər müəyyənləşib. 15 yaşadək oğlanlar arasında 10 km məsafəyə fərdi ötüşmədə İsmayıl Xankişiyev (ROEQİUGVM) birinci olub. Abdurrəhman Rəfiyev (AE Cycling School) ikinci, Emil Abbasov (AE Cycling School) üçüncü yeri tutub.

17 yaşadək oğlanların 20 km məsafəyə fərdi ötüşməsində Raul Mahmudov (AE Cycling School) qalib gəlib. Emil Vaxrameyev (ROEQİUGVM) ikinci, İlkin Sadıqzadə (Təhsil) üçüncü olub.

Yeniyetmə qızların 10 km məsafəyə fərdi ötüşməsində isə Məryəm Hüseynova (ROEQİUGVM) ən yaxşı nəticəni göstərib. Elenika Vəlizadə ikinci, Sevinc Sultanzadə (AE Cycling School) üçüncü olub.

İkinci yarış günündə Qobustan rayonunda qrup ötüşməsi üzrə mübarizə aparılıb. 15 yaşadək oğlanların 60 km məsafəyə qrup ötüşməsində İsmayıl Xankişiyev yenidən qalib olub. Anar Mustafazadə (Təhsil) ikinci, Ayxan Pənahlı (AE Cycling School) üçüncü yeri tutub.

17 yaşadək oğlanlar arasında 80 km məsafəyə qrup ötüşməsinin qalibi Raul Mahmudov olub. Əli Zeynalzadə (ROEQİUGVM) ikinci, İlkin Sadıqzadə (Təhsil) üçüncü olub.

Yeniyetmə qızların 20 km məsafəyə qrup ötüşməsində isə Məryəm Hüseynova qızıl medal qazanıb. Sevinc Sultanzadə ikinci, Elenika Vəlizadə üçüncü olub.

Beləliklə, İsmayıl Xankişiyev, Raul Mahmudov və Məryəm Hüseynova hər iki yarış növündə qalib olaraq Ölkə Kubokunda maksimum nəticə göstəriblər.