"Qarabağ"ın akademiya komandaları — U-16 və U-19 Tbilisi "Dinamo"su ilə qarşılaşıb.
Prosport.Az 12 avqustda keçirilən yoxlama matçlarından sonra "Qarabağ" Akademiyasının koordinatoru Aftandil Hacıyevdən müsahibə alıb.
– Oyun haqqında fikirləriniz necədir?
– Bu gün və 3 gün sonra 2 oyun olmaqla, U-16 və U-19 komandalarımız yoldaşlıq görüşləri keçirəcəkdi. Bu gün hər iki görüş baş tutdu. Hər iki komanda da kifayət qədər sürətli futbol nümayiş etdirdi. Düşünürəm ki, belə görüşlərin sayı çoxaldıqca gənc futbolçularımız təcrübələrini artırar, beynəlxalq oyunların sürətini və oyun anlayışını daha yaxından tanıyarlar. Bugünkü görüşlər həm U-19, həm də U-16 komandaları üçün faydalı oyun oldu. Hesab fərq etmir, necə olursa-olsun. Meydanda kifayət qədər sürətli və texnikalı futbolçular gördük.
– Həm U-16, həm də U-19 yaş qruplarında çıxış edən oyunçuların performansından razı qaldınız?
– Əlbəttə. Hazırda hazırlıq mərhələsidir və hər bir futbolçunun hazırlığının yüksəlməsi üçün belə yoxlama görüşlərinə ehtiyac var. Düşünürəm ki, həm U-19, həm də U-16 komandalarında futbolçular bütün bacarıqlarını ortaya qoymağa çalışdı. Təbii ki, tam olaraq hazırlıqları pik formasında olmaya bilər. Amma getdikcə oyunların sayı çoxaldıqca performansları yaxşılaşacaq. Düşünürəm ki, bu gün həm U-19, həm də U-16 yaş qruplarında yaxşı şeylər oldu. Oyunların sayı artdıqca daha yaxşı olacaqlar.
– Yoxlama oyunları üçün təklif ilk olaraq sizdən gəldi, yoxsa rəqib tərəfdən?
– "Dinamo" ilə sıx əlaqələrimiz var. Dosrluq müsahibətimiz davam edir. Biz yoxlama görüşlərinin keçirilməsi ilə bağlı təklif etdik. Onlar da müsbət cavab verdi. Növbəti yoxlama görüşləri 2 həftə sonra Gürcüstanda – Tbilisidə baş tutacaq. Bu dəfə fərqli yaş qrupları olacaq. Yenə U-19 yaş qrupunda oyunlar keçiriləcək, amma daha çox 2007 və 2008-ci il təvəllüdlü gənclər olacaq. U-15 komandalarımız isə bu dəfə 2 qrup şəklində Tbilisiyə yola düşəcək.
– Hər iki yaş qrupundan rəqib komandanın oyunlarını izlədiniz. Bəyəndiyiniz futbolçu oldumu?
– Əlbəttə. Gürcüstan hər zaman istedadlı futbolçuları ilə seçilib. Bu gün də beynəlxalq oyunlarda bir çox gürcü futbolçuları izləyirik. Onların ən məşhuru da Xviça Kvaratsxeliadır. Bu gün də meydanda həqiqətən kifayət qədər istedadlı futbolçular gördük. Bəlkə də 2-3 ildən sonra bu futbolçuları beynəlxalq arenalarda görəcəyik.
– Bir müddət əvvəl xəbər çıxmışdı ki, “Qarabağ” Akademiyası üçün Suraxanıda əlavə torpaq sahəsi alınıb və həmin ərazidə fəaliyyət göstərəcək. Həmin torpaq alınıbmı? Sənədləşmə prossesi hansı mərhələdədir?
– Bəli, belə bir söhbətlər gedir. Hazırda danışıqlar son mərhələyə gəlib çıxıb və Suraxanıda verilən ərazinin rəsmi sənədləşmə ərəfəsindəyik. Gələcəkdə bu işlər bitdikdən sonra düşünürəm ki, “Qarabağ” Akademiyasında dünya standartlarına uyğun çalışacağıq, müasir akademiyamız olacaq.
Bahar Rüstəm